„Djöfull er ég hel­víti drullufúll“

HK-ingar, sem höfnuðu í 8. sæti Olísd-deildarinnar, létu deildarmeistarana heldur betur hafa fyrir hlutunum í kvöld og fóru með þá alla leið í framlengingu. Halldór Jóhann segir hins vegar að aðrir en leikmenn hafi haft áhrif á úrslitin.

„Mér fannst við gera allt á þessum 60 mínútum til þess að vinna. Mér fannst sigurinn bara vera tekinn af okkur síðasta korterið þar sem að mér halla alveg hrikalega á okkur í dómgæslunni. Ég verð bara að segja það,“ bætti Halldór við.

„Það eru bara fullt af atvikum og ef þú horfir á leikinn aftur síðasta korterið þá eru fullt af atvikum. Það eru fullt af vítum, fullt af ruðningsdómum þar sem ekki var dæmdur ruðningur, Sigga (Sigurði Jefferson) er haldið inni á línunni þegar er verið að reyna að spila á hann og ekkert dæmt, Gústi (Ágúst Guðmundsson) er jarðaður í gólfið og það er ekkert flautað. Svo er fjöldinn allur af öðrum atvikum hérna og þeir fá raunverulega bara svolítið hlutina rétta upp í fangið. Þeir þurfa ekkert á því að halda því þeir eru með nógu gott handboltalið til að vinna okkur hérna í dag.“

Halldór sá þó ýmislegt jákvætt í leik sinna manna í kvöld.

„Við vorum bara vel undirbúnir og klárir í þetta. Við spiluðum við þá fyrir fáeinum vikum og við tókum mikinn lærdóm af þeim leik. Við vildum selja okkur dýrt og við spiluðum góðan leik,“ sagði Halldór.

„Menn geta alveg sagt að Valur hafi ekki spilað góðan leik og það verður örugglega orðræðan eftir leikinn. En mér fannst við bara setja þá undir mikla pressu og þeir lentu í vandræðum. Þannig var þetta bara. En við vildum selja okkur dýrt. Þetta er bara útsláttarfyrirkomulag og það er enginn að verja neitt. Það eru allir á núllpunkti og við vildum bara selja okkur dýrt og ná í fyrsta sigurinn. Það er bara þannig.“

„Það tókst ekki í dag, en djöfull er ég helvíti drullufúll af því að mér fannst við eiga skilið að vinna.“

Þá hefur hann trú á því að sínir menn mæti með sama orkustig í heimaleikinn gegn Val á sunnudaginn.

„Ég held að þetta verði bara bensín á tankinn. Það var einhver tölfræði sem ég sá um daginn að við værum ekki búnir að ná í stig á móti Val í 13 ár, en við náum allavega jafntefli á móti þeim í venjulegum leiktíma í kvöld. Ég held að menn séu alveg búnir að sjá það og hafi trú á því að við getum unnið Val og það er það sem við ætlum að gera á sunnudaginn.“

Að lokum segir hann að liðið þurfi aðeins að gera litlar breytingar á sínum leik til að komast yfir línuna á sunnudaginn.

„Það vantaði aðeins inn í liðið í kvöld. Það voru smá veikindi og smá meiðsli og vantaði þrjá leikmenn í liðið í kvöld. Eða eiginlega fjóra því við erum með einn sem er eiginlega bara nýbyrjaður að æfa eftir augnskaða og við erum í smá brasi með það að gefa mönnum pásu.“

„Þegar þú ert kominn inn í framlengingu á móti jafn sterku liði og Val þá verður þetta auðvitað erfitt. Bjöggi (Björgvin Páll Gústavsson) kemur sterkur inn hjá þeim í lokin og ver vel á meðan við fáum kannski ekki alveg sömu markvörslu og það er bara rosa stutt á milli þarna. Við þurfum að spila góða vörn og vera ótrúlega agaðir sóknarlega og koma boltanum á markið með góðum skotum, hlaupa til baka og standa fyrstu árás vel. Það er bara svolítið það sem við þurfum að gera á sunnudaginn,“ sagði Halldór að lokum.