Valdi HM yfir kærastann

Eftir að hafa þríbætt Íslandsmet Guðrúnar Arnardóttur í 60 metra grindahlaupi fékk Júlía Kristín boð með skömmum fyrirvara.

„Ég er ennþá svolítið að átta mig á því að þetta sé að gerast. En ég er ofboðslega spennt og rosa ánægð að það sé bara eitt 60 metra hlaup eftir en síðan förum við aftur út og þá eru 100 metra grind eftir en ekki 60. Þá eru önnur met að slá þar,“ segir Júlía kokhraust en um er að ræða síðasta innanhúsmót ársins. Á þeim er keppt í 60 metra grindahlaupi en 100 metrum utanhúss.

Júlía hafði planað helgarferð með kærasta sínum vestanhafs en þau plön breyttust hratt.

„Ég átti að fara til Boston að hitta kærastann minn, við áttum að vera á leið á hótelið á miðvikudaginn. En ég valdi frekar að fara á HM og hitta kærastann bara á Íslandi í staðinn. Maður getur alltaf farið til Boston en ekki alltaf farið á HM,“ segir Júlía.

Þið gátuð sem sagt hist hér heima og sambandið ekkert búið þó ferðinni sé aflýst?

„Nei, nei, ég hef náð að hitta hann alla daga hérna og við nýtum þá vel saman áður en maður fer aftur út,“ segir Júlía létt.

Júlía stundar nám í Bandaríkjunum og er hluti af sterkri frjálsíþróttadeild við Rice University í Texas. Ein önnur úr skólanum fékk boð á mótið.

„Ég er er eina úr skólanum. Það er ein önnur sem fékk boð en hún ákvað að sleppa því. Hún var líka búin að plana eitthvað með kærastanum,“ segir Júlía og hlær.

Júlía keppir í 60 metra grindarhlaupi kvenna, en hlaupið verður mjög sterkt. 47 keppendur frá 34 þjóðum eru skráðir til leiks í greininni. Júlía er yngst keppenda í greininni en hún er fædd 2005.

Hún hleypur í hádeginu á morgun, sunnudag.

Viðtalið í heild má sjá að neðan.