„Ég er bara í sjokki enn­þá“

Christina, eða Alba eins og hún er almennt kölluð, er ein þriggja sem fara á HM innanhúss. Aníta Hinriksdóttir verður fyrst í brautina síðar í dag en Alba fer í brautina í fyrramálið.

Keppnin í 60 metra hlaupi kvenna er sterk í ár, en alls eru 54 keppendur frá 39 þjóðum skráðir til leiks.

Alba er meðal yngri keppenda og er sú næst yngsta í greininni. Það kom henni á óvart að vera á leið á heimsmeistaramót.

„Þetta er bara geggjað, ég var ekki að búast við þessu. Ég er bara í sjokki ennþá. Ég trúði ekki þjálfaranum mínum þegar hann sagði mér þetta,“ segir Alba í samtali við Sýn.

„Ég er mjög spennt, en mjög stressuð. Ég hef verið á Norðurlandamóti, sem var fyrir þremur vikum en þetta er fyrsta stórmótið. Þetta er crazy sko,“ segir Alba.

Alba kemur á mótið í fínu formi. Hún varð Íslandsmeistari í 60 m hlaupi á Meistaramóti Íslands innanhúss þegar hún hljóp á 7,42 sekúndum, sem var jafnframt mótsmet.

Hún hefur sett markmið sitt á Íslandsmetið sem er 7,35 sekúndur.  

„Mig langar að bæta mig og kannski að slá Íslandsmet. Það væri geggjað.“

Þannig að Íslandsmetið er að fara að falla þarna úti í Póllandi?

„Kannski. Já, já, segjum það bara,“ segir Alba og hlær.

Viðtalið má sjá í spilaranum.