Andrea byrjuð að slá met í Ástralíu: „Stærsti sigurinn“ að finna gleðina á ný

Andrea keppti í Golden Trail World Series hlaupi í morgun og bætti brautarmetið í þessu rúmlega 20 kílómetra hlaupi um rúmlega tíu mínútur. Með sigri í hlaupinu fékk hún gylltan farseðil á úrslitamótið Golden Trail sem fer fram í Suður-Kóreu.

Ástralar þurfa nú að venjast því, eins og Íslendingar vöndust síðustu ár, að brautarmet eru alltaf í hættu þegar Andrea er annars vegar.

Andrea er greinilega komin á gott skrið eftir erfiðleika síðasta árs. Líkamlega heilsan var þá ekki upp á sitt besta og andlegir erfiðleikar fylgdu.

Í vetur hefur Andrea búið í Ástralíu og hún sagði frá því á Instagram hversu ánægð hún væri með hlaupið í morgun.

„Ég er bara svo ógeðslega ánægð hvað þetta gekk vel og hvað mér fannst gaman að keppa. Maginn var góður og hugarfarið var gott. Síðustu keppnir, síðasta ár, var ég eitthvað svo stressuð og setti allt of mikla pressu á mig.

Það tók mestu gleðina í burtu, þannig að það er klárlega stærsti sigurinn að hafa fundið aftur þann anda. Auðvitað skilaði það líka betra hlaupi og það er ógeðslega gaman að hafa unnið þetta líka. Ég var ekkert búin að kynna mér keppendurna og vissi ekki alveg hversu sterkt þetta yrði. En ógeðslega skemmtileg braut, tíu kílómetra upp og tíu kílómetra niður… Þetta boðar mjög gott fyrir gott ár,“ sagði Andrea í sögunni á Instagram.

Næst á dagskrá hjá þessari öflugu hlaupakonu er keppni á Tenerife eftir tvær vikur.