Él og slyddu­él í dag og önnur lægð á morgun

Suðaustan 10 til 18 metrar á sekúndu með él síðdegis, en hægari vestantil. Hiti yfirleitt 0 til 5 stig yfir daginn. Seint í kvöld fer lægðardrag úr landi, dregur úr vindi og kólnar. Léttir til norðaustanlands.

Ný lægð á morgun

Samkvæmt hugleiðingum veðurfræðings myndast í kvöld ný lægð sem myndast suður af Hvarfi og kemur til okkar á morgun. Þá má búast við vaxandi austan- og suðaustanátt og snjókomu eða slyddu með köflum, en 10 til 18 metrum á sekúndu með rigningu síðdegis.

Lengst af verður þurrt á Norðausturlandi fram á kvöld. Hiti 2 til 6 stig seinnipartinn. Snýst í suðlæga átt 8-13 m/s með skúrum eða slydduéljum suðvestantil undir kvöld.

Suðvestan hvassviðri með skúrum eða éljum á þriðjudag. Snýst í austlæga átt eftir hádegi með rigningu og slyddu, en styttir upp norðan- og norðvestantil. Hiti breytist lítið.

Þungfært um land allt

Víða um land er þungfært og hálka eða hálkublettir. Þá eru einhverjir vegir lokaðir en víðast hvar fært. Í ábendingu veðurfræðings Vegagerðir segir að vetrarfærð sé á landinu mest öllu og geti verið þung. 

Þrátt fyrir minni vind í dag, sunnudag, en hafi verið síðustu tvo daga heldur áfram að snjóa drjúgt úr éljum og bökkum víða sem getur viðhaldið erfiðum akstursskilyrðum. Vegfarendur er hvattir til að fara varlega og kynna sér akstursskilyrði og umferð fyrir ferðalög.

Hægt er að fá nánari upplýsingar um færð vega á vef Vegagerðar og veður á vef Veðurstofunnar.

Veðurhorfur á landinu næstu daga

Á mánudag: Gengur í austan og suðaustan 10-18 m/s með snjókomu eða rigningu, en að mestu þurrt norðanlands fram eftir degi. Hiti 0 til 6 stig. Snýst í suðvestan 8-15 með skúrum eða éljum sunnan- og vestantil um kvöldið.

Á þriðjudag: Suðvestlæg eða breytileg átt 3-10, skýjað með köflum og sums staðar dálítil él, en léttir til á Norðaustur- og Austurlandi. Vaxandi austanátt með snjókomu eða slyddu sunnan- og austantil seinnipartinn. Hiti breytist lítið.

Á miðvikudag: Fremur hæg suðvestlæg átt, en norðaustan 13-20 norðvestantil. Víða snjókoma eða slydda, en úrkomuminna sunnan- og austantil. Hiti nálægt frostmarki.

Á fimmtudag og föstudag: Ákveðin norðanátt með snjókomu, en lengst af þurrt sunnantil. Hiti um eða undir frostmarki.

Á laugardag: Útlit fyrir breytilega átt. Dálítil él austast á landinu framan af degi, en annars yfirleitt bjart. Frost 2 til 10 stig. Vaxandi suðlæg átt með snjókomu eða rigningu og hlýnandi veðri vestantil um kvöldið.