Handbolti

Framarar safna á­fram sigrunum eftir Evrópuflakkið

Óskar Ófeigur Jónsson skrifar
Einar Jónsson er búinn að koma Framliðinu í gang eftir erfiða byrjun á vetrinum.
Einar Jónsson er búinn að koma Framliðinu í gang eftir erfiða byrjun á vetrinum. Vísir/Vilhelm

Fram vann fjögurra marka sigur á HK, 33-29, í Olís-deild karla í handbolta í Lambhagahöllinni í kvöld.

Þetta var sjötti sigur Framara í sjö deildarleikjum síðan þeir luku keppni í Evrópudeildinni í byrjun desember.

Viktor Sigurðsson var með sex mörk og fjórar stoðsendingar fyrir Fram og Ívar Logi Styrmisson skoraði einnig sex mörk. Dánjal Ragnarsson var með fjögur mörk og Breki Hrafn Árnason varði fjórtán skot í markinu.

Haukur Ingi Hauksson, Hjörtur Ingi Halldórsson og Andri Þór Helgason í HK-liðinu voru markahæstu menn vallarins með sjö mörk hver.

Fram var með sex marka forskot í hálfleik, 20-14, en Kópavogsbúar gáfust ekki upp og minnkuðu muninn niður í tvö mörk í seinni hálfleiknum, 28-26.

Þá komu þrjú Frammörk í röð og liðið vann á endanum sannfærandi sigur.

Fram náði KA að stigum í sjötta og sjöunda sæti deildarinnar og er nú tíu stigum á undan HK sem situr í áttunda sæti.

HK-ingar hafa tapað fjórum af síðustu fimm leikjum og hafa enn ekki unnið útileik á árinu 2026.




Fleiri fréttir

Sjá meira


×