Ís­raelskir Ólympíu­forkólfar vilja banna sjón­varps­lýsanda

Ástæðan er sú að umræddur lýsandi sakaði ísraelska bobbsleðakappann Adam Edelman um að styðja „þjóðarmorðið á Gaza“ í beinni útsendingu.

Lýsandinn rökstuddi ummælin með yfirlýsingum Edelmans á samfélagsmiðlum.

Svissneska ríkisútvarpið RTS hefur síðan þá fjarlægt upptökuna af umræddri bobsleðakeppni af vefsíðu sinni, en ver jafnframt starfsmann sinn.

RTS er frönskumælandi deild svissneska ríkisútvarpsins SBC.

Times of Israel greinir frá því að ísraelska Ólympíunefndin hafi nú sent formlega kvörtun vegna atviksins. Þar er krafist afsökunarbeiðni.

„Ummælin sem féllu í útsendingunni voru einhliða, pólitísk og ögrandi og eiga ekki heima á ólympískum vettvangi,“ skrifar Gili Lustig, forsvarsmaður Ólympíunefndarinnar, í bréfinu.

Ísraelar bæta við að þeir vænti „skýrrar og opinberrar afsökunarbeiðni frá RTS“ auk þess sem fari fram „tafarlaus endurskoðun á áframhaldandi aðkomu lýsandans að útsendingum tengdum Ólympíuleikum, þar á meðal að lýsandinn verði settur í tímabundið bann frá umfjöllun um Ólympíuleikana“.