Dag­skráin í dag: Meistara­deild Evrópu og risaslagur í Bónus deildinni

Fyrstu fjögur einvígin af átta í umspili fyrir sextán liða úrslit Meistaradeildar Evrópu hefjast í kvöld og veislan byrjar á fyrri leik Galatasaray og Juventus. Sá leikur hefst klukkan korter í sex og verður sýndur í beinni útsendingu á Sýn Sport Viaplay. 

Hinir leikir kvöldsins hefjast svo allir klukkan átta. Leikur Benfica og Real Madrid verður sýndur á Sýn Sport Viaplay en þessi lið mættust einmitt í lokaumferð deildarkeppni Meistaradeildarinnar þar sem að Benfica hafði betur og tryggði sig áfram í umspilið á ævintýralegan hátt. 

Á Sýn Sport verður Frakklandsslagur af bestu gerð þegarað Mónakó tekur á móti Paris Saint-Germain og á Sýn Sport 2 tekur Dortmund á móti Atalanta. 

Leikirnir verða allir gerðir upp í Meistaradeildarmörkunum á Sýn Sport klukkan tíu. 

Toppslagur í Bónus deildinni

Þá eru leikirnir ekki síðri í Bónus deild kvenna í körfubolta í kvöld. Þrjú lið eru jöfn á toppi deildarinnar með tuttugu og fjögur stig og tvö þeirra, Haukar og Njarðvík, mætast í kvöld á Ásvöllum. Leikurinn hefst klukkan korter yfir sjö og verður sýndur í beinni útsendingu á Sýn Sport Ísland. 

Á sama tíma á Sýn Sport Ísland 2 tekur Valur á móti Stjörnunni. Valskonur eru aðeins tveimur stigum frá toppsætinu. Þá tekur Ármann á móti Tindastól á Sýn Sport Ísland 3.