Gífur­lega þýðingar­mikill sigur HK gegn Þór

Sigurinn er mikilvægur í meira lagi en fyrir leik var HK í 10.sæti með tíu stig en Þórsarar í 11.sæti með einu stigi minna. 

Leikurinn var jafn framan af og þegar að fyrri hálfleikur rann sitt skeið munaði aðeins einu marki á liðunum, 20-19 HK í vil. 

Seinni hálfleikur byrjaði líkt og þeim fyrri lauk, hvorugu liðinu tókst að slíta sér frá hinu en þegar að rétt rúmlega tíu mínútur eftir lifðu leiks gengu HK-ingar á lagið. Byggðu upp forskot á skömmum tíma sem Þórsurum tókst ekki að brúa.

Svo fór að HK náði að sigla heim fimm marka sigri, 36-31. Sigur sem er afar mikilvægur fyrir liðið í baráttunni við botn deildarinnar. 

Með sigrinum slítur HK sig frá neðstu tveimur liðum deildarinnar, Þór og ÍR, stekkur upp í áttunda sæti þar sem liðið situr með tólf stig. Þórsarar eru áfram í 11.sæti með níu stig.  

Haukur Ingi Hauksson fór hamförum í liði HK í kvöld og skoraði ellefu mörk og Brynjar Vignir Sigurjónsson átti síðan frábæran leik í marki liðsins. Hann varði alls fjórtán skot og var með markvörslu upp á tæp 44 prósent.