„Gott að kveljast líka og vita upp á sig skömmina“

„Það var vont að fá á sig þetta áhlaup undir lok fyrri hálfleiks. Við vorum búnir að byggja upp ágætis forskot og svo vorum við hrikalega mistækir varnarlega og við buðum þeim aftur inn í leikinn.“

„Þeir byrjuðu síðari hálfleik vel en síðan náðum við að læsa vörninni og þá kom betri taktur sóknarlega,“ sagði Finnur Freyr og hélt áfram að tala um áhlaup ÍA sem endaði í sautján stigum í röð. 

„Við gerðum mistök varnarlega. Þeir eru með frábæra leikmenn og það var erfitt að eiga við stóru turnana þeirra undir körfunni. Mér fannst við vera að klikka og gefa þeim auðveldar körfur.“

Finnur var ánægður með þær áherslubreytingar sem liðið gerði á Darryl Latrell Morsell sem var með 16 stig í fyrri hálfleik en aðeins 6 stig í síðari hálfleik. 

„Við vorum að gefa honum of mikið pláss í þessum stuttu skotum en gerðum svo vel í að taka þau í burtu. Við fengum svo færri hraðar sóknir á okkur þar sem hann er frábær.“

Aðspurður út í hvort Valsmenn höfðu gott af pásunni sem fylgdi því að vera ekki að spila í VÍS-bikarnum í síðustu viku tók Finnur undir það.

„Það er gott að kveljast líka og vita upp á sig skömmina og vita hversu ömurlegir við vorum búnir að vera. Við vorum í þjáningunni saman að djöflast og menn höfðu gott af því,“ sagði Finnur Freyr að lokum.