Mark­vörður Íslendingaliðsins hættir vegna fjárhagsvandræða fé­lagsins

Kolstad sendi frá sér fréttatilkynningu og þar kom fram að ástæða ákvörðunarinnar væri sögð vera fjárhagsstaða félagsins undanfarið.

„Til að tryggja sjálfbærari rekstur hefur verið nauðsynlegt að lækka launakostnað og því hafa aðilar í sameiningu komist að lausn sem hentar báðum,“ skrifaði Kolstad í tilkynningu sinni.

Með liðinu spila íslensku leikmennirnir Sigvaldi Björn Guðjónsson, Benedikt Gunnar Óskarsson og Sigurjón Guðmundsson en sá síðastnefndi er markvörður.

„Kolstad Håndball kann vel að meta þær uppbyggilegu viðræður sem átt hafa sér stað í ferlinu og telur að Andreas hafi sýnt af sér fagmennsku í alla staði. Jafnframt er mikilvægt að árétta að hann ber auðvitað enga ábyrgð á þeim fjárhagserfiðleikum sem Kolstad hefur gengið í gegnum,“ sagði framkvæmdastjórinn Jostein Sivertsen.

Palicka sjálfur leynir því ekki að hann hefði kosið aðra niðurstöðu.

„Tími minn hjá Kolstad Håndball varð öðruvísi en ég bjóst við. Á sama tíma hef ég skilning á áskorunum félagsins og hef því átt þátt í lausn sem er báðum aðilum fyrir bestu. Ég óska Kolstad alls hins besta í framtíðinni,“ sagði Palicka.

Hinn 39 ára gamli leikmaður hefur spilað fyrir nokkur stór evrópsk félög á ferlinum. Kiel, Aalborg og Paris Saint-Germain eru meðal þeirra liða sem Palicka hefur staðið í marki fyrir.

Hann yfirgaf Frakkland og PSG til að ganga til liðs við Kolstad árið 2025.