Elliði Snær marka­hæstur í mikil­vægum sigri

Strákarnir hans Guðjóns Vals mættu tilbúnir til leiks í kvöld enda um mikilvægan leik þar sem að sigur myndi gera mikið fyrir Gummersbach í baráttunni um Evrópusæti. Liðið sat í sjötta sæti fyrir leikin en Flensburg í öðru sæti.

Gummersbach leiddi allan leikinn og óx ásmegin eftir því sem að leið á hann. Mest náði liðið tíu marka forystu seint í seinni hálfleik og sigldi að lokum heim sjö marka sigri, 33-26.

Íslenski landsliðsmaðurinn Elliði Snær var virkilega flottur í liði Gummersbach í kvöld og skoraði átta mörk og endaði sem markahæsti leikmaður vallarins. Þá skoraði Teitur Örn Einarsson eitt mark í leiknum fyrir Gummersbach.

Um tólfta sigur Gummersbach í deildinni var að ræða á yfirstandandi tímabili, þann þriðja í röð. Lærisveinar Guðjóns Vals verma áfram sjötta sæti deildarinnar en þeir eru að setja pressuna á liðin fyrir ofan sig. 

Svekkjandi tap Erlangen

Þá voru þeir Viggó Kristjánsson og Andri Már Rúnarsson í eldlínunni með Erlangen í kvöld á móti Hannover Burgdorf. Þar dugði flottur leikur Viggós, sem skoraði fimm mörk og lagði upp önnur fimm, ekki til því niðurstaðan var svekkjandi eins marks tap Erlangen, 29-30. Andri Már skoraði eitt mark og lagði upp annað í leiknum. Erlangen er því áfram í 12.sæti þýsku úrvalsdeildarinnar með 14 stig.