Stökk sem var bannað í hálfa öld

Malinin er 21 árs og er þekktur sem  í sögunni sem „Quad-guðinn“ eftir að hafa orðið sá fyrsti í sögunni til að ná að gera fjórfaldan Axel í keppni.

Það var hins vegar annað stökk sem vakti mesta kátínu hjá áhorfendum, þegar Malinin sýndi sín tilþrif í liðakeppninni á Vetrarólympíuleikunum í Mílanó um helgina. Þar gerði hann nefnilega heljarstökk aftur á bak, sem ekki hafði verið leyft á leikunum síðan árið 1976.

Stökkið var bannað á sínum tíma og var ein helsta ástæðan sú að það þótti einfaldlega of hættulegt enda keppendur ekki með hjálm eða annað til að hlífa höfðinu ef illa færi.

Reglunum í keppni á listskautum var hins vegar breytt árið 2024 og því eru leikarnir í ár þeir fyrstu síðan í Innsbruck árið 1976 þar sem hægt er að vinna sér inn stig með því að framkvæma heljarstökk aftur á bak.

Bandaríkjamaðurinn Terry Kubicka framkvæmdi stökkið í Innsbruck á sínum tíma og varð þá fyrstur til þess.

Hin franska Surya Bonaly gerði það þó einnig á Vetrarólympíuleikunum árið 1998, þegar hún hafði dottið snemma í sínum æfingum og vissi að hún hefði misst af verðlaunum. Hún náði að lenda á öðrum fæti en fékk hins vegar engin stig fyrir þessi tilþrif sín vegna þess að þau voru bönnuð.

Malinin á eflaust eftir að endurtaka stökkið og freista þess að vinna fleiri verðlaun í Mílanó en hann keppir í stutta prógramminu á morgun og frjálsa prógramminu á föstudaginn.