Reif buxurnar nánast af Yamal sem lét ekki stoppa sig

Heimamenn reyndu hvað þeir gátu að stöðva Lamine Yamal og félaga, eins og myndin hér að ofan sýnir, en það kom ekki í veg fyrir að Yamal gerði eina mark fyrri hálfleiks, á 39. mínútu, með frábæru skoti í fjærhornið. 

Ronald Araújo jók svo muninn í 2-0 snemma í seinni hálfleik en heimamenn gáfust ekki upp.

Mark var dæmt af Albacete á 84. mínútu, vegna rangstöðu, en liðið minnkaði muninn skömmu síðar þegar Javi Moreno skoraði með skalla. Fran Gámez fékk svo dauðafæri til að jafna metin í uppbótartíma en Gerard Martín bjargaði með skalla á marklínu.

Börsungar eru því fyrstir inn í undanúrslitin en áfram verður spilað í 8-liða úrslitunum á morgun og á fimmtudag. Orri Steinn Óskarsson og félagar í Real Sociedad eru enn með í keppninni og mæta Alavés á útivelli annað kvöld. Velancia mætir þá Athletic Bilbao og á fimmtudaginn er svo leikur Real Betis og Atlético Madrid.