Bæði lið Hauka gætu unnið bikarinn

Handknattleiksdeild Hauka hefur þegar hvatt fólk til að taka frá dagana 25.-28. febrúar, þegar úrslitin ráðast í bikarnum, enda ljóst að félagið á nú fulltrúa í undanúrslitum beggja kynja.

Sigur kvennaliðsins á 1. deildarliði Víkinga í kvöld var aldrei í hættu. Haukakonur náðu strax frumkvæðinu og komust meðal annars í 10-5, og voru 16-11 yfir í hálfleik.

Tíu marka kvöld Rakelar

Víkingum tókst mest að minnka muninn í þrjú mörk í seinni hálfleik en svo stungu Haukar af og unnu að lokum átta mraka sigur.

Rakel Oddný Guðmundsdóttir var þeirra markahæst með 10 mörk og Jóhanna Margrét Sigurðardóttir skoraði 5. Hildur Guðjónsdóttir skoraði 8 mörk fyrir Víkinga og Auður Brynja Sölvadóttir 5.

Framkonur eru einnig komnar í undanúrslitin, eftir sigur gegn ÍR í gær, og KA/Þór eða Grótta bætist í hópinn í kvöld. Loks mætast FH og Valur annað kvöld.

Hjá körlunum leika Haukar, KA, ÍR og FH í undanúrslitunum, og því ekki útilokað að fleiri en Haukar eigi tvö lið þegar bikarveislan verður haldin í lok mánaðarins.