Eitt besta skautalið heims í Reykja­vík: „Við myndum elska að keppa við Ís­land“

Kanadíska liðið heldur sérstaka sýningu fyrir Íslendinga í Skautahöllinni í Reykjavík í dag, áður en liðið heldur á stórt mót í Finnlandi. Liðið sýnir stutta prógrammið sitt klukkan 17:20 og sérstök eftirvænting ríkir svo fyrir frjálsa prógramminu sem liðið sýnir um klukkan 18, þar sem sóttur er innblástur í kvikmyndina Wonder Woman.

„Ég er svo spennt. Við elskum prógrömmin okkar svo mikið og það er svo gaman að fá að sýna fólki,“ segir Georgina Yardy, einn af meðlimum NEXXICE.

Um er að ræða lið sem orðið hefur heimsmeistari í tvígang, árin 2009 og 2015.

„Þær eru bara mjög góðar. Þær eru á topp tíu á heimsmælikvarða og hafa orðið heimsmeistarar tvisvar sinnum. Þjálfari liðsins hefur komið áður til Íslands og við þekkjumst ágætlega. Hún spurði mig hvort að þetta væri möguleiki og við gripum gæsina. Frábært að fá þær hingað,“ segir Ásdís Rós Clark, íþróttastjóri listskautadeildar SR.

Ásdís þekkir vel til Jennifer Beauchamp-Crichton sem er annar þjálfara NEXXICE í ferðinni og var í heimsmeistaraliðinu árið 2009.

„Við höfum rætt um það í nokkur ár að vilja koma með liðið okkar til Íslands. Þetta var fullkomið tækifæri úr því að við erum á leið til Helsinki á mót, að geta æft hérna og verið á þessum fallega stað. Við elskum þessa höll og erum mjög spennt að fá að sýna listir okkar,“ segir Jennifer sem hefur áður komið til Íslands að þjálfa, þó að nokkuð sé um liðið síðan þá.

Ísland hefur átt slitrótt samband við samhæfðan skautadans en upp úr aldamótum varð hér til lið sem varð fyrsta íslenska kvennalandsliðið í hópíþrótt til að komast á Heimsmeistaramót. Íþróttin hefur legið í ákveðnum dvala síðustu ár en til stendur að breyta því og hver veit nema að Nexxis þurfi að keppa við Skautafélag Reykjavíkur í framtíðinni:

„Það væri bara stórkostlegt. Við myndum elska að keppa við Ísland. Því fleiri lönd því betra,“ segir Jennifer.

„Við erum að byrja núna með nýtt lið,“ segir Ásdís Rós sem var í kvennalandsliðinu sem fór á HM 2003. „Við áttum lið hérna áður en því miður hætti samhæfður skautadans hérna á Íslandi í kringum árið 2015. En við erum að vonast til að geta byggt aftur upp lið og átt mögulega lið einhvern tímann aftur á heimsmeistaramóti,“ bætir hún við.

Stelpurnar í NEXXICE mæla í það minnsta heils hugar með íþróttinni.

„Þetta tekur mikið á en ég er svo þakklát því við fáum að gera það sem við elskum á hverjum einasta degi. Það eru ekki margir sem fá tækifæri til þess,“ segir fyrrnefnd Georgina Yardy og liðsfélagi hennar, Brynn Wilkinson, skýtur inn í: „Sérstaklega ekki á svona fallegum stað eins og hér á Íslandi.“