Sér fyrir sér brons­verð­laun um hálsinn

Danaleikurinn sat eðlilega í mönnum þegar fjölmiðlaviðburður fór fram í gærmorgun.

„Þetta var gífurlega mikið svekkelsi. Við ætluðum alla leið í úrslitin og fannst við eiga það skilið. En þetta er handbolti og það má lítið fara úrskeiðis til að Danirnir hafi unnið þetta. Það gerðist, það voru smáatriði sem við klikkuðum og þeir ná að nýta sér. En samt sem áður fannst mér við spila góðan leik og eiga meira skilið,“ segir Elliði sem þurfti ásamt öðrum leikmönnum að rífa sig á lappir til að mæta snemmmorguns á fjölmiðlaviðburð eftir langa nótt.

„Maður getur ekkert sofið endalaust fram eftir. Ég hefði viljað sitja aðeins lengur við morgunmatinn og fá mér tvo kaffibolla í viðbót. En maður mætir bara þar sem maður á að mæta,“ segir Elliði léttur.

Hvað þreytu varðar eftir átta leiki á 15 dögum segist Elliði ætla að taka stöðuna á skrokknum síðar.

„Það er bara brons í boði á sunnudaginn og svo er hægt að spá í það hvernig skrokkurinn hafi það.“

Ísland mætir Króötum í annað sinn á mótinu eftir að hafa tapað með eins marks mun í fyrsta leik í milliriðli í Malmö fyrir viku síðan. Bæta á fyrir það.

„Okkur leið eins og við hefðum getað gert mikið betur í síðasta leik og eigum við inni eftir hann. Við erum spenntir að takast á við þá,“ segir Elliði.

Halda eigi uppteknum hætti, keyra á Króatana og setja þreytuna til hliðar.

„Hún verður að gera það. Það er ekkert annað í boði. Við ætlum að hlaupa á þá, það er leikplanið okkar og við hættum því ekki. Við höfum fengið auðveldustu mörkin okkar úr því að hlaupa á andstæðingana okkar. Þreyta er bara afsökun núna, það telur ekki með,“

Ertu búinn að sjá bronsið fyrir þér um hálsinn?

„Klárlega.“

Ísland og Króatía mætast klukkan 14:15 í dag í leik um bronsið á EM. Teymi Sýnar mun fylgja liðinu áfram eftir hvert fótmál fram að leik.