Tókst eftir tíu ára bið: „Hef alltaf haft trú“

„Í gær (í fyrradag) var þetta náttúrulega algjör alsæla eftir leik. Loksins. Þetta er mitt tíunda stórmót og þetta tókst í tíundu tilraun. Ég hef samt alltaf haft trú á því að við værum að fara að gera þetta hvert einasta ár,“ segir Bjarki Már í samtali við Vísi.

Íslenska liðið sé ekki komið til þess eins að vera með. Besta leiðin til að njóta augnabliksins sé að spila vel.

„En þá kemur líka strax það að maður vill ekki bara koma hingað til að vera með heldur gera vel og fá einhver verðlaun fyrir það sem við höfum verið að gera. Núna er einbeiting á verkefnið, að njóta þess að vera hérna og maður nýtur þess náttúrulega best þegar vel gengur,“ segir Bjarki Már.

Eins og hann segir er einbeitingin mikil á verkefni dagsins enda þörf á. Andstæðingurinn ríkjandi heimsmeistarar Danmerkur á þeirra heimavelli.

„Þeir eru bara besta landslið í heimi enda heimsmeistarar. Þeir eru ótrúlega góðir, með tvo til þrjá frábæra leikmenn í öllum stöðum en ef þú ætlar langt endarðu alltaf á að mæta þessum þjóðum. Við tökum þessu verkefni fagnandi,“ segir Bjarki Már.

Eilífðar baráttan

Ísland mætir til leiks eftir skrautlegan milliriðil þar sem skiptist á skini og skúrum. Tvisvar missti liðið örlögin úr eigin höndum, með tapi fyrir Króötum og svo jafntefli við Sviss. Á milli þeirra leikja kom stórkostlegur sigur á Svíum og svo gegn Slóvenum til að tryggja sætið.

Verkefnið núna er að stilla spennustigið rétt eftir góðan sigur.

„Það er eilífðar barátta. Við höfum verið svolítið verið upp og niður, þó við höfum heilt yfir átt gott mót. Við ætlum okkur að eiga tvo góða leiki í röð núna, fyrst gegn Slóvenum og svo gegn Dönum,“ segir Bjarki sem hefur trú á verkefninu.

„Ég hef trú. Í öll þessi tíu skipti hef ég alltaf haft trú á því að við værum að fara í úrslit og það er ekkert breytt núna.“

Fleira kemur fram í viðtalinu við Bjarka sem sjá má í spilaranum.

Ísland mætir Danmörku klukkan 19:30 í Boxen í Herning í kvöld. Íþróttateymi Sýnar mun fylgja landsliðinu eftir og koma stemningunni vel til skila í fréttatímum Sýnar sem og á Vísi í allan dag.