Aldrei séð Dag svona reiðan

Undanúrslitaleikirnir í dag, á milli Króatíu og Þýskalands klukkan 16:45 og á milli Íslands og Danmerkur klukkan 19:30, fara fram í Boxen í bænum Herning í Danmörku. 

Þar hafa Danmörk og Þýskaland verið að spila sína leiki allt mótið en Ísland og Króatía þurftu að ferðast í fjóra tíma frá Malmö í gær, á eina hvíldardeginum frá því að milliriðlakeppninni lauk.

Þetta var þó vitað fyrir mót, sem og það hve hræðilega þétt leikjadagskráin yrði. En ofan í það virðist hafa farið illa um menn í rútu króatíska liðsins og þá fékk Ísland minni rútu svo níu starfsmenn HSÍ þurftu að taka lest og bílaleigubíl.

Ivan Forjan, fréttamaður hjá Nova TV í Króatíu, segir að það sem hafi reitt Dag enn frekar til reiði hafi verið þegar mótshaldarar tilkynntu á miðvikudagskvöld að Króatar þyrftu svo að dvelja á hóteli í Silkeborg, í 40 kílómetra fjarlægð frá Herning. 

Þetta flækti enn fyrir Degi í gær sem gaf leikmönnum sínum frí frá æfingu en þurfti að ferðast á blaðamannafundinn í Herning og aftur til baka, og hafði því enn minni tíma en ella til að undirbúa stórleikinn í dag með sínum mönnum.

„Þegar Dagur Sigurðsson komst að þessu þá brjálaðist hann alveg. Fólk í kringum hann segir að það hafi aldrei séð hann svona,“ sagði Forjan.

Dagur fór svo á blaðamannafund og lét gamminn geisa, og sagði Króata flutta á milli staða eins og frosinn kjúklingur, og að allt snerist um sýningu EHF án nokkurs tillits til leikmanna eða liðanna á mótinu.

„Þau eru eins og skyndibitastaður, þeim er alveg sama um gæðin, þau vilja bara selja. Eða reyndar, þau eru eins og viðburðarfyrirtæki, sem pantar bara einhverja listamenn til að setja upp sýningu og flottan blaðamannafund. Það skiptir þau engu máli að við hefðum þurft að keyra í fjóra tíma frá Malmö í morgun, það skiptir þau engu máli,“ sagði Dagur meðal annars.

„Við vorum í riðli í Malmö, við fengum tvo færri daga en sum lið til að spila sjö leiki. Allir sem vita eitthvað um íþróttir vita að sjö leikir á tólf dögum er mjög mikið, mjög mikið. Svo þurftum við að spila sjötta og sjöunda leikinn á innan við 22 klukkutíma tímaramma. Næsta morgun er okkur hent upp í rútu, eins og frosnum kjúklingi, og keyrt með okkur á stað sem er ekki einu sinni nálægt höllinni,“ sagði Dagur einnig og hefur hann fengið mikið lof fyrir ræðu sína.

Króatískir blaðamenn í vandræðum

Í skrifum króatíska handknattleikssambandsins segir að áður hafi verið búið að tilkynna að Króatar myndu fá að dvelja í Herning en þessu hafi svo óvænt verið breytt í fyrrakvöld, eftir að Króatía hafði tryggt sig inn í undanúrslit með sigri á Ungverjalandi. Þetta hafi einnig flækt málin hjá króatískum fjölmiðlamönnum sem hafi allir átt bókaða gistingu í Herning og flestir ekki verið með bíl til að keyra til Silkeborg til að taka viðtöl við leikmenn.