„Þetta leit kannski þægi­lega út því við gerðum þetta hrika­lega vel“

„Þetta leit kannski þægilega út því við gerðum þetta hrikalega vel,“ sagði Gísli í samtali við Val Pál Eiríksson eftir leikinn í Kristianstad í dag.

Mikið var talað um óhefðbundinn leikstíl Ítalíu í aðdraganda leiksins. Gísli hrífst af því sem Ítalir gera en segir að Íslendingar hafi leyst það vel í leiknum í dag.

„Það er ákveðin fegurð í því að láta þetta líta einfalt út þegar þetta er það svo sannarlega ekki. Fyrir mína parta gera Ítalarnir þetta hrikalega vel og það verður að hrósa þeim fyrir hvað þeir gera þetta viðstöðulaust allan tímann. Óhefðbundið eða ekki óhefðbundið? Þú spilar bara handbolta eins og þú vilt spila handbolta. Ef það er árangursríkt er það gott en ef það er ekki þannig er það bara þannig,“ sagði Gísli.

„Við gerðum lítið af tæknimistökum. Það er stór plús þegar þeir spila svona framarlega, að við séum ekki að missa boltann og fá einföld mörk í bakið. Þetta var mjög agaður leikur af okkar hálfu. Við vorum með gott leikplan. Auðvitað var smá stress og fiðringur fyrir leik og í byrjun en það var mikilvægt að við héldum okkar striki og héldum áfram samkvæmt leikplani og gerðum þetta hrikalega vel.“

Gísli segir að biðin eftir fyrsta leik á EM hafi verið löng.

„Svo sannarlega. Maður vildi byrja þetta. Þetta er byrjað núna og byrjar vel en núna tekur við endurheimt, horfa á leikinn hjá þeim (Pólverjum) og vera klárir í aðra baráttu ekki á morgun heldur hinn,“ sagði Gísli.

Hann bar sig vel eftir leikinn, þrátt fyrir mikil átök.

„Ég er þreyttur en þetta er bara partur af stórmótum. Maður er orðinn vanur þessu. Maður er bara í takti hvað varðar endurheimt, hugsa vel um skrokkinn, borða vel og allar þessar klisjur. Núna er það bara næst á dagskrá,“ sagði Gísli.

Viðtalið við Gísla má sjá í spilaranum hér fyrir ofan.