Þarf stundum að kalla á eigin­konuna „komdu að sofa ástin“

Í kaffispjalli um helgar er rætt við fólk í ólíkum störfum. Við spyrjum alltaf um hvenær fólk vaknar á morgnana, hvað það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Ég vakna um sjöleytið.“

Hvað er það fyrsta sem þú gerir á morgnana?

„Morgunrútínan er mjög fastmótuð – ég kann best við það. Við hjónin skiptum með okkur verkum þegar kemur að börnunum okkar þremur, ég tek morgunvaktina og hún eftirmiðdaginn. Morgnarnir byrja á því að vekja krakkana og gefa þeim að borða, oft hafragraut og smyrja nestið. 

Okkar yngsta barn, sem er 6 ára, les heima. Það virkar betur en eftirmiðdagarnir. Stundum spilar svo dóttir okkar 11 ára á píanó sem er kósý. 

Allir morgnar byrja á lýsi hjá mér og steinefnum en ég sleppi morgunmat sjálfur og svo rjúkandi cappochino handa konunni og sjálfum mér. Í kjölfarið tekur vinnan við með verkefni dagsins.“

Á skalanum 0-10, hversu rómantískur ertu?

„Erfið spurning. Ætli ég myndi ekki gefa sjálfum mér 7. Svona fyrir ofan meðalag. 

Rómantík er ekki Valentínusardagur í mínum huga. Rómantík snýst um litlu hlutina og þeir verða persónulegir. 

Til að mynda færi ég konunni alla morgna góðan cappochino bolla, sem hún elskar. Um helgar vek ég hana með bollanum upp í rúm því ég er yfirleitt vaknaður á undan. 

Svo er ég mikið fyrir snertingu, svo frúin fær gott framboð af knúsi. Stundum er framboðið meira að segja örlítið umfram eftirspurn! 

Ég vil gera hlutina saman með henni og hún finnur það. 

Rómantík er á endanum tjáning af öllum toga sem segir ég elska þig.“

Í hvaða verkefni ertu að vinna helst þessa dagana?

„Um það bil helmingur starfs míns felst í að vinna beint með viðskiptavinum Ceedr á Íslandi og utan Íslands og stuðla að vexti þeirra fyrirtækja í gegnum stafrænar sölu- og markaðsleiðir. Með hjálp leitarvéla, spjallmenna, samfélagsmiðla og tækni eins og Hubspot. 

Nýlega varð Ceedr til að mynda Platinum Partner með Hubspot en slíkum innleiðingum fyrir fyrirtæki á Norðurlöndunum hefur fjölgað mikið. Inn í þetta blandast sú öra þróun sem er í gangi í tækninni, gervigreindin og athygli okkar allra er þar. 

Hinn helmingurinn fer í daglegan rekstur og daglega uppbyggingu Ceedr á Norðurlöndunum og takast á við þær fjölmörgu áskoranir okkar eigin vaxtarskeiðs. Þar skiptir miklu máli að vera í sterkri tengingu við lykilfólk erlendis og styðja við teymin okkar á þann hátt sem tryggir árangur. Lykilverkefnið er að viðhalda rekstrarhagkvæmni á sama tíma og við fjárfestum í uppbyggingu Ceedr á nýjum mörkuðum. Verkefnin eru þar að leiðandi virkilega fjölbreytt og skemmtileg.“

Hvernig skipuleggur þú þig í vinnu?

„Fyrir utan flæðandi to-do lista, þá nota ég verkumsjónarkerfi sem er mikilvægt í rekstri verkefna á milli landa, sem og skýra markmiðasetningu hjá mér og teyminu öllu, svokölluð KPIs. Mælaborð, calendar og Gemini hjálpa mikið. 

Upphaf vikunnar tek ég nokkuð af stuttum samtölum við teymi sem vinnur í Finnlandi, Osló eða Búdapest, sem dæmi en starfsfólk okkar er í fimm löndum, og fer þannig yfir málefni líðandi stundar og kortlegg vikuna.“

Hvenær ferðu að sofa á kvöldin?

„Ég upp úrppúr ellefu. Ég vil helst sofna snemma og vakna snemma. 

Eiginkonan er meiri B-manneskja, svo það togast örlítið á þar. Nú er hún komin með prjónaveikina frá ömmu sinni og prjónar flest kvöld sem mér þykir lúmskt vænt um. Ég þarf því stundum að kalla á hana „komdu að sofa ástin“ þar sem erfitt er að leggja prjónunum.“