Bretar ætla að fram­leiða skotflaugar fyrir Úkraínu

Í ávarpi sem hann birti um helgina sagði Selenskí að Rússar hefðu þegar byrjað að finna fyrir auknum þrýstingi og að aðrar aðgerðir væru í undirbúningi. Vísaði hann til leynilegra aðgerða og árása með langdrægum vopnum í Rússlandi.

Ríkisstjórn Bretlands tilkynnti í dag að þar væri búið að hefja ákveðið verkefni um að þróa skammdrægar skotflaugar fyrir Úkraínumenn. Það ætti að gerast á tiltölulega stuttum tíma og á þessum eldflaugum að vera ætlað að bæta varnir Úkraínumanna og gera þeim kleift að gera árásir dýpra í Rússlandi. Óljóst er hvort Selenskí hafi um helgina verið að vísa til þessa verkefnis Breta.

Samkvæmt yfirlýsingunni eiga skotflaugarnar að geta borið tvö hundruð kíló af sprengiefnum og hæft skotmörk í rúmlega fimm hundruð kílómetra fjarlægð. Verkefninu er einnig ætlað að bæta hergagnaframleiðslu í Bretlandi.

Í yfirlýsingunni vísar John Healey, varnarmálaráðherra Bretlands, til ítrekaðra árása Rússa með eldflaugum og drónum á bæi og borgir Úkraínu. Rússar hafa fjölgað árásum sínum á orkuinnviði Úkraínu, samhliða miklu kuldakasti þar.

Fá ár til að smíða fyrstu flaugarnar

Verkefni þetta ber titilinn Nightfall og er vonast til að það muni skjótt skila skotflaugum sem eru nothæfar á nútímavígvelli þar sem mikið er um alls konar truflanir á staðsetningarbúnaði og útvarpssendingum.

Hægt á að vera að skjóta eldflaugunum á loft af margs konar farartækjum og skjóta mörgum þeirra á stuttum tíma og hörfa í flýti, áður en andstæðingurinn getur svarað með eigin eldflaugum eða stórskotaliðsárásum.

Þrjú teymi verða valin til að þróa eldflaugarnar og á það val að fara fram í mars. Þessi teymi eiga svo að hafa ár til að þróa og framleiða fyrstu þrjár flaugarnar til tilrauna. Þá stendur til að velja það fyrirtæki sem fær stærri samning.

Bretar vonast til þess að geta framleitt tíu slíkar skotflaugar á mánuði og að þær muni ekki kosta meira en átta hundruð þúsund pund, stykkið. Það samsvarar um 136 milljónum króna.

Reyna að draga úr tekjum Rússa

Úkraínumenn hafa einnig unnið að því að þróa eigin vopn til árása í Rússlandi, meðal annars sjálfsprengidróna og stýriflaugar. Undanfarna mánuði hafa þeir gert fjölmargar árásir á olíu- og gasvinnslustöðvar í Rússlandi, auk innviða. Síðustu vikur hafa Úkraínumenn þar að auki gert árásir og borpalla í Kaspíahafi og skip úr rússneska skuggaflotanum svokallaða.

Sala á olíu og jarðgasi er langstærsta tekjulind rússneska ríkisins.

Sjá einnig: Svona virkar skuggaflotinn

Lindsey Graham, öldungadeildarþingmaður Repúblikanaflokksins í Bandaríkjunum, sagði frá því í síðustu viku að hann hefði fengið Donald Trump, forseta, til að veita frumvarpi um hertar refsiaðgerðir gagnvart Rússum blessun sína. Frumvarpið, sem nýtur stuðnings þingmanna úr báðum flokkum Bandaríkjanna, var samið fyrir mörgum mánuðum síðan en aldrei lagt fyrir þing vegna andstöðu Trumps.

Hann sagði að frumvarpið myndi gera Trump kleift að refsa ríkjum sem kaupa enn olíu af Rússlandi og fjármagna þannig stríðsrekstur Rússa. Sala á olíu og jarðgasi er langstærsta tekjulind rússneska ríkisins.

Graham vísaði sérstaklega til Kína, Indlands og Brasilíu og sagði að frumvarpið myndi gefa Trump mikið vogarafl gagnvart þeim til að fá ráðamenn þar til að hætta að kaupa olíu af Rússlandi.

Þingmaðurinn vonaðist til þess að hægt yrði að leggja frumvarpið fram í þessari viku en blaðamenn sem fjalla sérstaklega um þingið telja það hæpið.