Stoltur af stráknum en ætlar ekki að kaupa hann aftur

Andri Már er í landsliðshópnum sem Snorri Steinn Guðjónsson opinberaði á dögunum og það er í fyrsta sinn sem hann er í lokahópi fyrir stórmót.

Rúnar kveðst stoltur af drengnum, en þeir félagar gátu eytt aðfangadegi saman, áður en þeir fóru í sitthvora áttina að undirbúa leiki í þýsku deildinni með sitthvoru liðinu í þýsku deildinni á morgun. Wetzlar sækir Lemgo heim og Erlangen mætir Kiel.

„Þetta er mjög ánægjulegt fyrir hann, að komast inn í þennan hóp og hann hefur stefnt að því, held ég, síðan hann var í þessum U21 hópi sem vann brons. Þetta er næsta skref og hann er mjög ánægður með það. Og ég er náttúrulega stoltur af því að hann sé valinn, það er engin spurning um það,“ segir Rúnar í samtali við íþróttadeild.

Er þetta ekki verðskuldað val?

„Ég myndi segja það. Hann er búinn að stimpla sig inn í deildina, mjög vel síðasta vetur og núna með nýju liði er hann kominn á gott ról. Ég held hann sé á góðu rönni og var það fyrir,“ segir Rúnar.

Stutt í gagnrýnina

Rúnar fékk Andra til Þýskalands þegar hann stýrði Leipzig og Andri raðaði inn mörkum með liðinu á síðustu leiktíð. Rúnari var sagt upp í sumar og þá færði Andri sig til Erlangen.

Óhætt er að segja að viðskilnaðurinn við þá feðga hafi ekki skilað miklu fyrir félagið sem er neðst í þýsku deildinni með fimm stig, tveimur á eftir Wetzlar, sem Rúnar var að taka við.

Rúnar segir þó ólíklegt að hann reyni að fá Andra til liðs við sitt nýja félag.

„Nei, ég held að við endurtökum ekki þann leik. Þegar fer að ganga illa, eins og maður vissi, þá er þetta það fyrsta sem er bent á. Þegar svona aðstæður koma upp þá er betra að það sé enginn skyldur manni í þessu. Svo er það misjafnt hvernig lið tækla þetta. En eins og hann spilaði fyrir Leipzig, með markahæstu mönnum í deildinni í fyrra, ættu þeir að sjá eftir honum held ég,“ segir Rúnar.