Allt að 1500 króna munur á jólabókunum milli verslana

Verðlagseftirlit ASÍ kannaði verð á jólabókum þann 18. desember í sex verslunum, Bónus, Nettó, Hagkaup, Forlaginu, Bóksölu Stúdenta og Eymundsson en alls var verð kannað á 496 bókatitlum. Vöruúrval er mismunandi milli verslana, en fæstir bókatitlar fundust í Bónus, alls 170, og flestir í Eymundsson, alls 479.

Af þeim bókatitlum sem voru til í öllum verslunum var lægsta verðið oftast að finna í Bónus á meðan hæsta verðið var oftast að finna í Forlaginu. Ef lágvöruverslanirnar Bónus og Nettó eru undanskildar, var lægsta verðið oftast að finna í Bóksölu Stúdenta.

Í tilkynningu frá ASÍ segir að segja megi að verðstríð sé í gangi á milli Nettó og Bónus, þar sem litlu muni á verði sem hafi farið lækkandi frá því verðlagseftirlit skoðaði verð fyrr í mánuðinum. Afslættir í Eymundsson hafa verið tíðir í aðdraganda jóla og því lítið mark takandi á upphaflegu listaverði.

„Algengt er að verðmunur hlaupi á bilinu 500-1500 krónum á bækurnar og því getur verið gott fyrir neytendur að gera verðsamanburð,“ segir í tilkynningunni. 

Bónus oftast ódýrust en úrvalið mest hjá bóksölum

Af þeim 76 bókatitlum, sem fundust í öllum sex verslunum, voru 71 ódýrastir í Bónus (93%), fjórir í Nettó og einn í Bóksölu stúdenta. Forlagið var dýrast í helmingi tilfella (38 titlar), en Hagkaup fylgir þar fast á hæla (29 titlar – 38%).

Ef eingöngu er litið úrvals í Bóksölu stúdenta, Eymundsson, Forlaginu og Hagkaup voru 302 bókatitlar fáanlegir í verslununum fjórum. Af þeim var Bóksala stúdenta með ódýrasta verðið í 128 tilfellum (42%) og Hagkaup í 80 (27%). Dýrustu titlarnir fundust í rúmlega helmingi tilfella í Hagkaupum (165 titlar – 55%), en næst oftast hjá Forlaginu (81 titill – 27%).

Allt að þriðjungsmunur á metsölubókum

Kvöldsónatan eftir Ólaf Jóhann Ólafsson er sem stendur efst á metsölulista Eymundsson. Bókina mátti finna frá 5.947 kr. upp í 7.890 kr. Ódýrust var hún í Bónus og kostaði einungis krónu meira í Nettó. 

Í Hagkaup fékkst hún á 6.599 kr. en meðal bóksala var hún ódýrust hjá Eymundsson. Hæsta verðið var í Forlaginu, 7.890 kr. og munaði því tæpum tvö þúsund krónum á hæsta og lægsta verði, eða nærri þriðjungi.

Verð á völdum bókum af metsölulistum má sjá á meðfylgjandi súluriti.

Svipaður verðmunur er á hæsta og lægsta verði þegar borið er saman verð á Skólastjóranum eftir Ævar Örn Benediktsson, þar sem um 1.900 kr. munaði á hæsta og lægsta verði. Sem fyrr var ódýrasta verðið að finna í Bónus ( 4.603 kr.) en bókin var dýrust í Hagkaupum (6.499 kr.).

Verðstríð á bókum hjá Bónus og Nettó

Kapp hefur verið milli Nettó og Bónus að hafa lægsta verðið á sínum jólabókum, þar sem Bónus hefur haldið hársbreiðu forskoti.

Þegar skoðaðir eru bókatitlar, sem fást í báðum verslunum, er Bónus ódýrast í 121 af 126 titlum. Verðmunur hvers titils er að jafnaði innan við 1,5%. Til að setja það í samhengi myndi sá sem kaupir alla sameiginlegu bókatitlana spara 7.227 krónur milli Bónus og Nettó. Það gerir 1,38% heildarmismun á milli verslana.

Milli 3. og 18. desember lækkuðu verð á rúmlega þremur fjórðu bóka í Bónus, ein bók hækkaði í verði, en tæpur fjórðungur var á óbreyttu verði. Alls var verðþróun 156 bóka skoðuð. Bækurnar sem lækkuðu í verði lækkuðu að meðaltali um 44 krónur, eða um þrjár krónur á dag.

Í Nettó lækkuðu 58% bóka í verði á sama tímabili en 39% voru á óbreyttu verði. Fimm bækur hækkuðu í verði, en alls voru 203 bækur til skoðunar. Bækurnar sem lækkuðu í verði lækkuðu um að meðaltali 83 krónur, eða um fimm og hálfa krónu á dag.

Eymundsson með tíða afslætti

Í október, nóvember og desember hafa afslættir í Eymundsson verið tíðir. Má þar nefna Tax Free daga í nóvemberbyrjun, 20% afslátt af öllum vörum í Kringlunni 4. nóvember, „11.11“-afslætti 7.-11. nóvember, svarta daga 25.-30. nóvember, mánudags-nettilboð 1. desember, aftur Tax Free dagar 4.-8. desember, 20% afsláttur af matreiðslubókum 10.-11. desember og enn einir Tax Free dagarnir 17.-19. desember. Fleiri afsláttardagar voru á öðrum vörum en bókum þessu til viðbótar.

„Þegar afsláttardagar eru svo tíðir – og fleiri verðlækkanir á hinum og þessum vörum inn á milli – getur gerst að bók er nær aldrei á listaverðinu sem afsláttarverðið miðar við,“ segir í tilkynningu ASÍ.

Til dæmis er tekin Huldukonuna eftir Fríðu Ísberg. Samkvæmt athugunum verðlagseftirlitsins á verði bókarinnar, sem voru 39 talsins frá 7. nóvember til 18. desember, var bókin aðeins seld á listaverðinu 8.699kr fyrsta daginn, þann 7. nóvember. Nú er hún auglýst á 20% afslætti miðað við það verð, og hefur raunar verið undir listaverði í öllum mælingum verðlagseftirlitsins frá 8. nóvember.

Verð bókarinnar Piparmeyjar eftir Sigríði K. Þorgrímsdóttur var athugað 55 sinnum frá 23. október til 18. desember. Listaverðið hefur aðeins mælst tíu sinnum, en lægri verð 45 sinnum.

Sjá má verðþróun nokkurra bóka hér að neðan til að glöggva sig á þessu mynstri.

Verðlagseftirlit ASÍ tekur fram að söguleg verð hjá Eymundsson voru könnuð með uppflettingu í leitarvél fyrirtækisins. Ekki er útilokað að misræmi sé á milli leitarvélarinnar og verðs út úr búð.

Samanburðinn má sjá í heild sinni hér. Neytendum er bent á að hægt er að bera saman nýjustu verð á Verdlagseftirlit.is eða með samanburði í Nappinu.