Teitur fer á EM sem horna­maður í stað Sig­valda

Snorri Steinn Guðjónsson, þjálfari íslenska karlalandsliðsins í handbolta, tilkynnti í dag hvaða átján leikmenn verða með íslenska landsliðinu á Evrópumótinu í Svíþjóð, Danmörku og Noregi.

Þriðja mót Snorra

Þetta er þriðja stórmót Snorra með liðið en fjórtánda Evrópumótið í röð þar sem Ísland er meðal þátttökuþjóða.

Snorri hafði áður valið 35 manna úrvalshóp en nú valdi hann þá leikmenn sem munu taka þátt í mótinu fyrir Íslands hönd.

Af þeim átján sem Snorri valdi fyrir heimsmeistaramótið í fyrra eru fimmtán aftur með í ár. Það eru allir nema þeir Aron Pálmarsson og Sigvaldi Björn Guðjónsson.

Þorsteinn á bakvakt

Þorsteinn Leó Gunnarsson er ekki meðal þessara átján sem voru valdir í dag en hann er á bakvakt með markverðinum Einari Baldvin Baldvinssyni.

Þorsteinn er að glíma við meiðsli en er að koma til baka úr þeim. Ef æfingar ganga vel þá mun hann fara út á EM sem nítjándi maður í hópnum.

Þetta eru tímamót fyrir hægri hornastöðu íslenska landsliðsins. Sigvaldi Björn Guðjónsson var búinn að vera með á sjö stórmótum í röð með íslenska landsliðinu eða öllum mótum frá og með HM 2019.

Aron Pálmarsson lagði svo skóna á hilluna eftir síðasta tímabil og var því augljóslega ekki í boði fyrir þetta mót. 

Koma saman 2. janúar

Landsliðið kemur saman til æfinga hér á landi 2. janúar næstkomandi. Áður en liðið fer á Evrópumótið mun liðið spila við Slóveníu í undanúrslitum á æfingamóti í París í Frakklandi og mæta svo annaðhvort Frakklandi eða Austurríki í hinum leiknum.

Fyrsti leikurinn hjá íslensku strákunum á mótinu er á móti Ítalíu 16. janúar en Ísland er einnig með Póllandi og Ungverjalandi í riðli.