Messenger-forritið heyrir sögunni til

Lovísa Arnardóttir skrifar 17. desember 2025 16:35

Facebook hóf samþættingu Messenger og Facebook árið 2023 og hefur nú lokað borðtölvuforriti sínu fyrir Messenger. Vísir/Getty

Meta hætti fyrr í vikunni stuðningi við forrit Facebook Messenger í tölvu fyrir bæði Windows og macOS. Í forritinu var hægt að spjalla við vini án þess að opna Facebook. Enn er hægt að nota smáforritið í snjallsíma en ætli fólk að nota Messenger í tölvu þarf það að vera í gegnum Facebook eða Messenger.com. Í umfjöllun TechCrunch segir að líklega sé Meta að samþætta Messenger og Facebook aftur til að sporna við minni notkun á Facebook.

Reyni notendur að opna forritið í dag er þeim vísað inn á Facebook.com, en þeim sem nota Messenger án Facebook-aðgangs er vísað á Messenger.com. Þar þarf fólk að nota kóða til að tengjast.

Forritið er fimm ára gamalt en Messenger.com var opnaður fyrir um tíu árum. Í umfjöllun TechCrunch segir að þrátt fyrir að hafa verið upphaflega gefið út í upphafi Covid-19-faraldursins hafi forritið Messenger ekki getað stutt jafn marga þátttakendur í myndsímtölum og samkeppnisaðilar á fyrirtækjamarkaði eins og Zoom, og hafi ekki boðið upp á skjádeilingu eða auðdeilanlegar vefslóðir.

Þar segir einnig að Meta hafi nýlega breytt tækninni að baki forritinu og það hafi mjög líklega haft áhrif á eftirspurn notenda. Meta byrjaði árið 2023 að samþætta Messenger aftur inn í aðal-Facebook-farsímaforritið. Í umfjöllun TechCrunch segir að líklega tengist þessi breyting því að Meta sé að reyna að sporna við minni notkun á flaggskipi sínu, Facebook.

Í haust varaði fyrirtækið notendur við því að forritið Messenger yrði lagt niður fyrir árslok og hvatti notendur til að setja upp PIN-númer til að vista spjallferil sinn áður en þeir færu yfir á vefinn. Fólki sem notar Messenger án Facebook-aðgangs er vísað á Messenger.com eftir lokunina, þar sem það getur skráð sig inn án þess að stofna Facebook-aðgang.

Samfélagsmiðlar Facebook Meta