Botnliðið hrellti Aftur­eldingu og KA lék sér að eldinum

KA var 18-9 yfir gegn HK í hálfleik og náði að komast í 23-12 snemma í seinni hálfleik. Eflaust hafa flestir haldið að þar með væri leikurinn unninn en HK beit heldur betur frá sér og skoraði næstu sjö mörk í röð, svo staðan var 23-19 þegar enn voru tólf mínútur eftir.

Munurinn fór svo niður í tvö mörk á lokakaflanum en nær komust gestirnir ekki og leiknum lauk 30-27.

KA fer því í fríið í 5. sæti með 18 stig eftir 15 umferðir, stigi fyrir ofan ÍBV, en HK er í 9. sæti með 10 stig.

Magnús Dagur Jónatansson og Bjarni Ófeigur Valdimarsson skoruðu 7 mörk hvor fyrir KA en Andri Þór Helgason og Haukur Ingi Hauksson 6 mörk hvor fyrir gestina.

Afturelding áfram við toppinn

Leikurinn í Mosfellsbæ var spennandi. ÍR komst þó mest sex mörkum yfir í fyrri hálfleik en Afturelding náði að jafna fyrir lok hans, 17-17. Seinni hálfleikurinn var svo hnífjafn lengst af, eða þar til að heimamenn skoruðu fjögur mörk í röð og komust í 33-29 þegar skammt var eftir. Þeir unnu svo með þremur mörkum, 34-31.

Afturelding er því með 23 stig, stigi frá toppliði Vals, en ÍR verður á botninum fram í febrúar með sín fimm stig, fjórum stigum frá næsta örugga sæti.

Ihor Kopyshynskyi var markahæstur Aftureldingar í kvöld með 8 mörk og Andri Freyr Friðriksson skoraði 7. Hjá ÍR voru Bernard Kristján Owusu Darkoh og Baldur Fritz Bjarnason markahæstir með 10 mörk hvor. Einar Baldvin Baldvinsson hélt áfram að verja vel fyrir Aftureldingu og var með tæplega 35% markvörslu samkvæmt HB Statz.