Sjáðu Albert tryggja Fiorentina sætan sigur

Albert skoraði markið á 74. mínútu þegar hann var réttur maður á réttum stað í teignum og fylgdi eftir skalla Moise Kean. Markið má sjá hér að neðan.

Kean hafði sjálfur skorað fyrsta mark leiksins á 18. mínútu, með skalla, en Mykola Mykhailenko jafnaði metin á 55. mínútu.

Albert hóf leikinn á bekknum en kom inn á fyrir Edin Dzeko á 67. mínútu og var því ekki lengi að finna sigurmarkið.

Fiorentina er því með níu stig eftir fimm leiki og í fínum málum fyrir lokaumferðina eftir viku, þegar liðið sækir Lausanne heim. Fiorentina er sem stendur í 8. sæti en átta efstu liðin komast beint í 16-liða úrslit á meðan að liðin í 9.-24. sæti fara í umspil um átta laus sæti.