Gísli meiddist en fór aftur inn á völlinn: „Þurfti að tala læknana svo­lítið til“

Magdeburg vann fjögurra marka sigur á Melsungen. Gísli fékk slæma byltu í fyrri hálfleiknum og þurfti að fara af velli.

Hann harkaði af sér og kom aftur inn í seinni hálfleikinn en var greinilega þjáður.

„Vinstra rifbeinið er mjög aumt. Ég finn fyrir smá þrýstingi á maganum núna,“ útskýrði Gísli í samtali við handball-world. Eftir samráð við liðslækninn ákvað hann þó að halda áfram að spila. „Ég vildi hjálpa liðinu,“ sagði Gísli til að rökstyðja ákvörðun sína um að koma aftur inn í leikinn.

Þjálfari hans, Bennet Wiegert, lagði þó áherslu á að þeir voru ekki að taka óþarfa áhættu með Gísla: „Að lokum berast upplýsingarnar til mín og ég tek ákvörðunina. Við erum jú hér til að vernda leikmenn okkar,“ sagði Wiegert.

Já-ið hans er ekki alltaf já

Wiegert veit líka að hann þarf stundum að hægja á leikstjórnanda sínum: „Já-ið hans er ekki alltaf já.“ Hann fullvissar þó: „Ef það hefði verið umferðarljós sem hefði sýnt rautt ljós, hefðum við ekki séð hann aftur inni á vellinum,“ sagði Wiegert.

Gísli brosti og sagðist hafa þurft að tala læknana svolítið til svo hann fengi grænt ljós. Nánari upplýsingar eiga að liggja fyrir í dag: „Ég verð að bíða og sjá hvað röntgenmyndatakan segir á morgun. Þá sjáum við hvað er í gangi,“ sagði Gísli.

Þá mun koma betur í ljós hvort Gísli sé mikið meiddur og hvort að þessi meiðsli gætu haft einhver áhrif á undirbúning hans með íslenska landsliðinu fyrir Evrópumótið í janúar.

Gísli Þorgeir skoraði tvö mörk í leiknum og gaf eina stoðsendingu.