Carragher: „Ef Salah reynir að henda fé­laginu mínu undir rútuna veð ég í hann“

Liverpool gerði 3-3 jafntefli við nýliða Leeds í ensku úrvalsdeildinni á laugardaginn. Eftir leikinn ræddi Salah við fjölmiðla og honum lá mikið á hjarta. Hann sagðist hafa verið gerður að blóraböggli fyrir slæmt gengi liðsins, honum hafi verið hent undir rútuna og að samband hans og knattspyrnustjórans Arnes Slot væri brostið.

Salah ferðaðist ekki með Liverpool-liðinu til Mílanó þar sem það mætir Inter í Meistaradeild Evrópu í kvöld. Á blaðamannafundi fyrir leikinn sagðist Slot ekki hafa hugmynd um hvort Salah myndi spila aftur fyrir Liverpool.

Carragher tjáði sig um ummæli Salahs í Monday Night Football í gær. Hann sagði að Egyptinn hefði skipulagt viðtalið fyrirfram.

Reynir að valda sem mestum skaða

„Mér fannst skömm að því sem hann gerði eftir leikinn. Sumir hafa talað um þetta sem útspil manns í uppnámi en ég held að svo hafi ekki verið,“ sagði Carragher.

„Í hvert skipti sem Salah fer í viðtal eftir leiki, sem hann hefur gert fjórum sinnum á átta árum hjá Liverpool, er það vandlega undirbúið af honum og umboðsmanni hans til að valda sem mestum skaða og styrkja eigin stöðu. Hann valdi þessa helgi til að gera þetta núna og ég held að hann hafi beðið eftir slæmum úrslitum hjá Liverpool. Eftir jöfnunarmarkið undir lokin voru allir hjá Liverpool í sárum og hann valdi þennan tíma til að vaða í stjórann og jafnvel að reyna að láta reka hann.“

Einn af þeim bestu í sögu félagsins

Þrátt fyrir að vera vonsvikinn með framgöngu Salahs vonast Carragher til að hann spili áfram fyrir liðið.

„Hvort hann spilar aftur fyrir Liverpool veit ég ekki. Ég vona það því hann er einn af bestu leikmönnum sem við höfum haft. En ef þú heldur svona áfram og kemur með svona yfirlýsingar ef þú spilar ekki, hver veit?“ sagði Carragher.

Segist ekki hafa tekið Salah fyrir

Eftir leikinn gegn Leeds minntist Salah á Carragher og sagði að hann hefði gagnrýnt hann ítrekað.

„Hef ég einhvern tímann gagnrýnt Mo Salah á vellinum? Ég hef aldrei gagnrýnt hann fyrir að hlaupa ekki til baka. Ég hef aldrei gagnrýnt hann þegar hann hefur ekki skorað í leikjum. Ég hef aldrei gagnrýnt hann þegar hann hefur ekki gefið á einhvern þegar hann átti að gera það. Því hann er algjör goðsögn hjá félaginu og fyrir það sem hann gerir þarftu að sætta þig við ýmislegt,“ sagði Carragher.

„Mér finnst gagnrýnin á Salah á þessu tímabili hafa verið sumpart yfirdrifin. Ég hef sagt það opinberlega. En ef Salah reynir að henda félaginu mínu undir rútuna utan vallar og hugsar bara um sjálfan sig veð ég í hann.“

Liverpool mætir Inter á San Siro í Meistaradeildinni í kvöld. Leikurinn hefst klukkan 20:00 og verður sýndur beint á Sýn Sport Viaplay.