Spilar þrátt fyrir að vera í krabba­meins­með­ferð: „Sé fyrir endann á þessu“

Fyrr á þessu ári greindist Herrem með brjóstakrabbamein. Hún fór í aðgerð þar sem meinið var fjarlægt og fimm dögum eftir að hafa lokið lyfjameðferð sneri hún aftur á handboltavöllinn með liði sínu, Sola.

„Ég hefði aldrei getað ímyndað mér að spila handbolta á meðan æxlið var sem ágengast. Einn daginn er ég á vellinum, þann næsta á spítalanum,“ sagði Herrem í viðtali við L'Équipe.

„Það er mjög skrítið að hugsa til þess en ég reyni að velta mér ekki of mikið upp úr því. Ég er enn í meðferð en svara henni vel. Ég sé fyrir endann á þessu og æxlið minnkar.“

Búin að venjast hárleysinu

Herrem var sköllótt þegar hún byrjaði aftur að spila með Sola í haust. Fyrsti leikurinn var gegn Oppsal í lok ágúst.

„Fyrir leikinn hugsaði ég ekki um handbolta heldur hvað fólk myndi segja. Það var léttir að vera búin með tvær fyrstu umferðirnar, bæði á heima- og útivelli,“ sagði Herrem.

„Nú höfðu allir séð mig. Nú er það næstum orðið eðlilegt að sýna sig hárlausa.“

Herrem spilaði á tuttugu stórmótum með norska landsliðinu á sínum tíma en hún hætti í landsliðinu eftir EM í fyrra. Herrem lék 332 landsleiki og vann til ellefu verðlauna á stórmótum með norska liðinu sem Þórir Hergeirsson stýrði lengi.