Skynjar kvíða og ótta meðal starfs­manna

Norðurál tilkynnti um það í gær að framleiðsla hafi verið stöðvuð í annarri af tveimur kerlínum álvers Norðuráls á Grundartanga í kjölfar bilunar. Vilhjálmur Birgisson formaður Verkalýðsfélags Akraness og Starfsgreinasambandsins segir málið grafalvarlegt.

„Aðalmálið er að reyna að fanga það hversu langan tíma tekur að gera við þetta og það er eitthvað sem fyrirtækið þarf að svara. Ég hef verið að kalla eftir upplýsingum um það en það er erfitt að svara því,“ segir Vilhjálmur. 

„Ég geri mér alveg grein fyrir því að það er ekki verið að fara að setja verksmiðjuna af stað á næstu dögum eða næstu vikum.“

Skynjar kvíða og ótta

Sólveig Kr. Bergmann, framkvæmdastjóri samskipta hjá Norðuráli segir í samtali við fréttastofu að allir stjórnendur sitji á fundum til að reyna að leysa málið. Fyrirtækið gæti ekki tjáð sig fyrr en í fyrsta lagi eftir hádegi en fyrir liggur að flytja þarf búnað til landsins að utan til að koma framleiðslu aftur af stað.

„Ég skynja alveg ótta og kvíða meðal starfsmanna. Allir sem þekkja til reksturs álvera vita hvað það þýðir þegar búið er að slökkva á kerjum,“ segir Vilhjálmur.

Stóriðjan á Grundartanga skapar um 150 milljarða króna í útflutningstekjur á ári, sem eru um átta prósent af öllum útflutningstekjum þjóðarinnar. 

„Það þarf ekkert að fara í grafgötur með það að Grundartangasvæðið er lífæð okkar Akurnesinga og þegar sú æð stíflast þá hefur það veruleg áhrif,“ segir Vilhjálmur.

„Þetta snertir svo sannarlega okkur Akurnesinga en þetta snertir líka þjóðarbúið í heild sinni þegar svona skellur dynur á.“

Annar stóri skellurinn á rúmum sólarhring

Greint var frá því í fyrradag að dregið verði úr framleiðslu í járnblendiverksmiðju Elkem á Grundartanga. Í versta falli verði slökkt á einum þriggja ofna í fimmtíu til sextíu daga þó forstjóri Elkem á Íslandi vonar að ekki komi til þess. Engum verður sagt upp hjá félaginu.

Vilhjálmur segir þetta uggvænlegt fyrir íslenskan vinnumarkað.

„Ég held að hafi einhvern tíma verið þörf fyrir stjórnvöld að rýna í stöðuna og reyna að átta sig á því hvað er að gerast í íslensku samfélagi held ég að það sé núna. Það er mikilvægt að allir átti sig á því að öll samfélög byggjast upp á gjaldeyrisskapandi verðmætasköpun,“ segir Vilhjálmur. 

„Það er þannig sem við náum að halda úti okkar velferðarkerfi. Ef það verða hnökrar á slíku mun það bitna á þjóðarbúinu í heild sinni. Þetta er alvarlegur hlutur. Við skulum vona það besta en maður þarf að búa sig undir það versta.“ 

Víðtæk áhrif

Eimskipafélagið sendi tilkynningu til Kauphallar í morgun þar sem fram kemur að bilunin í Norðuráli sé rekstraráfall sem hafa muni neikvæð áhrif á Eimskip. Norðurál sé einn stærsti viðskiptavinur félagsins.

„Þetta mun hafa víðtæk áhrif á fjölmörg fyrirtæki. Þess vegna er svo mikilvægt að átta sig á því hvað við erum að tala um langt tímabil,“ segir Vilhjámur.

„Við Akurnesingar erum búnir að ganga í gegnum ótrúlegar hremmingar í okkar atvinnumálum á liðnum árum og þetta er ekki það sem við og nærsveitir þurfum á að halda.“