Sæ­mundur heims­meistari aftur

Sæmundur tryggði sér heimsmeistaratitilinn í -83 kílóa M4 flokki en það er flokkur öldunga 70 til 79 ára.

Sæmundur átti aldeilis flottan keppnisdag. Í hnébeygju lyfti hann best 150 kílóum sem skilaði honum gullinu þar.

Í bekkpressu lyfti Sæmundur mest 90 kílóum, reyndi við 95 kíló í þriðju sem vildu ekki upp. Níutíu kílóin skiluðu Sæmundi silfri í bekkpressu.

Í réttstöðulyftu opnaði Sæmundur á þægilegum 170 kílóum. Í lyftu tvö hækkaði hann um 10 kíló og fóru 180 kíló jafnlétt upp. Í lokalyftunni lyfti Sæmundur síðan 187,5 kílóum af öryggi. Sú lyfta skilaði honum gullinu í réttstöðulyftu.

Samanlagður árangur Sæmundar var því 427,5 kíló sem tryggðu Sæmundi gull í samanlögðu og heimsmeistaratitilinn í annað árið í röð

Þegar hann vann titilinn í fyrra þá fóru upp hjá honum 160 kíló í hnébeygju, 97,5 kíló í bekkpressu og 190 kíló í réttstöðulyftu eða 447,5 kíló samanlagt. Þetta skilaði honum gullverðlaunum í öllum flokkum.

Hann hefur þannig unnið sjö af átta gullverðlaunum á síðustu tveimur heimsmeistaramótum.