Oddvitarnir ætla sér stóra hluti eftir átta mánuði

Sveitarstjórnarkosningar verða haldnar laugardaginn 16. maí og þar á meðal borgarstjórnarkosningar í Reykjavík. Oddviti Viðreisnar og eini fulltrúi flokksins í borgarstjórn tilkynnti í morgun að hún ætlaði að láta staðar numið og myndi ekki leiða flokkinn í kosningunum heldur hverfa af vettvangi borgarstjórnar. 

Aðrir oddvitar í borgarstjórn eru flestir á því að taka slaginn áfram.

Heiða Björg Hilmisdóttir ætlar að bjóða fram krafta sína í forystu Samfylkingarinnar. Þetta staðfestir hún við RÚV. Heiða varð borgarstjóri í vor eftir að Einar Þorsteinsson, oddviti Framsóknar, sleit meirihlutasamstarfi flokksins við Samfylkinguna, Viðreisn og Pírata. Í framhaldinu mynduðu fimm flokkar meirihluta í Reykjavík undir forystu Heiðu Bjargar.

Heiða Björg hefur setið í borgarstjórn í tíu ár eða frá því í kosningunum 2015. Hún var í öðru sæti á lista flokksins í síðustu kosningum en tók við sem oddviti flokksins í janúar eftir að Dagur B. Eggertsson, fyrrverandi borgarstjóri, tók sæti á Alþingi. Hún varð svo borgarstjóri nýs meirihluta í febrúar eftir að Framsókn sprengdi borgarstjórnina.

Skynjar ákall um breytingar

Hildur Björnsdóttir hafði betur í baráttu við Ragnhildi Öldu Vilhjálmsdóttur um oddvitasæti Sjálfstæðisflokksins fyrir tæpum fjórum árum.

„Ég mun bjóða mig fram til forystu aftur,“ segir Hildur. „Við höfum verið á mikilli siglingu og stefnum á góðan árangur næsta vor. Við skynjum á fólkinu í borginni að það vill sjá nýja forystu í Ráðhúsinu.“

Sjálfstæðisflokkurinn hefur mest fylgi í borginni sem stendur miðað við nýlega Maskínukönnun. Flokkurinn mældist með 29,2 prósent en fékk 24,7 prósent í kosningunum 2022. Samfylkingin kemur næst á eftir með 25 prósent sem þó er fimm prósentum meira en í kosningunum 2022.

„Ég hef leitt flokkinn á þessu kjörtímabili og við finnum fyrir miklum meðbyr. Það væri ekki skynsamlegt að hlaupa frá borði núna. Ég hef mikinn metnað til að takast á við það sem bíður okkar eftir kosningar,“ segir Hildur full bjartsýni.

Hún segir kosningabaráttuna í raun hafna að hennar mati og flokkurinn fari fulla ferð áfram í þeirri baráttu. Guðlaugur Þór Þórðarson þingmaður og fleiri hafa verið orðaðir við áhuga um að leiða flokkinn í borginni í vor. Hildur segir auðvitað algengt að þegar fólk skynji meðbyr vilji það taka þátt.

„Við fögnum því. Við þurfum allar hendur í verkefnið sem fram undan er.“

Framsókn í lykilstöðu vilji fólk breytingar

Einar Þorsteinsson tók við sem borgarstjóri í Reykjavík í upphafi árs 2024. Um var að ræða samkomulag milli Samfylkingarinnar og Framsóknarflokksins við myndun borgarstjórnar eftir kosningarnar 2022. Það kom nokkuð á óvart þegar Einar ákvað að slíta borgarstjórnarsamstarfinu í febrúar síðastliðnum. Til stóð að mynda nýjan meirihluta með Viðreisn, Sjálfstæðisflokknum og Flokki fólksins en planið fór út um þúfur þegar Inga Sæland, formaður Flokks fólksins, hafnaði samstarfi við Sjálfstæðisflokkinn.

„Ég gef kost á mér að leiða lista Framsóknar aftur. Við náðum talsverðum árangri á þessu kjörtímabili, sýndum kjósendum að við erum tilbúin að berjast fyrir breytingum í borginni. Reyndum að ganga eins langt og við gátum í því en það er mikið verk óunnið. Þess vegna munum við halda áfram að berjast fyrir borgarbúa og ég gef kost á mér til að leiða listann.“

Framsókn náði frábærum árangri í kosningunum 2022 með tæplega nítján prósenta fylgi. Síðan hefur flokkurinn mælst undir fimm prósentum. Einar hefur fulla trú á viðsnúningi. Allt frá því flokkurinn fór í samstarf með Samfylkingunni, Viðreisn og Pírötum hafi fylgið hrunið og haldist þar allt kjörtímabilið. Kjósendur hafi ekki viljað að flokkurinn færi í þann meirihluta.

„Skilaboðin eru skýr frá kjósendum og þess vegna vildum við í Framsókn mynda meirihluta með flokkum sem voru tilbúnir að stefna í sömu átt og við en það tókst ekki.“

Nú sé boltinn hjá kjósendum en ljóst sé að meirihluti frá miðju til hægri verði ekki myndaður án Framsóknar. Afstaða til flokkanna sem stýri borginni nú hljóti að liggja fyrir. Framsókn hafi gengið úr því samstarfi og horfi til þeirra flokka sem séu tilbúnir að taka erfiðar ákvarðanir.

Óvissutímar hjá Sönnu

Fram kom á Vísi á dögunum að Sanna Magdalena Mörtudóttir, borgarfulltrúi Sósíalista, væri óviss um hvort hún færi fram fyrir Sósíalistaflokkinn í vor. Þá hafði hún breytt undirskrift sinni við skoðanagreinar á Vísi úr „borgarfulltrúi Sósíalistaflokksins“ í „sósíalískur borgarfulltrúi“. Hún sagðist opin fyrir samstarfi við aðra flokka.

„Það er ekkert launungarmál að ný stjórn Sósíalistaflokksins hefur ekki staðið heilshugar að baki borgarstjórnarflokknum,“ segir Sanna Magdalena við RÚV í dag. Miklar breytingar urðu á dögunum hjá Sósíalistaflokknum þegar Sönnu og Gunnari Smára Egilssyni, stofnanda flokksins, var hafnað í kosningum og listi sem Karl Héðinn Kristinsson, fyrrverandi forseti ungliðahreyfingar flokksins, vann sigur. Sanna sagði í framhaldinu af sér sem pólitískur leiðtogi flokksins, embætti sem hún hafði verið kjörin í tveimur dögum fyrr.

Líf Magneudóttir, oddviti Vinstri grænna í borginni, segist stefna á framboð fyrir flokkinn í vor. Fram hefur komið í máli Svandísar Svavarsdóttur formanns VG að hún sé opin fyrir samstarfi flokksins við aðra flokka á vinstri væng stjórnmálanna. 

Þetta sagði hún í júní en Vinstri græn féllu af þingi í Alþingiskosningum í nóvember. Svandís nefndi þó sérstaklega sveitarfélögin Kópavog, Árborg og Ísafjörð í því samhengi. Líf hefur sagt mikilvægt að VG bjóði fram undir eigin merkjum.

Framtíðin óræð hjá Helgu og Dóru 

Helga Þórðardóttir, oddviti Flokks fólksins, segir óráðið hvort hún gefi aftur kost á sér fyrir komandi kosningar og íhugar greinilega að segja skilið við leiðtogasætið.

„Ég hef sagt flokksfélögum mínum að ég vilji gjarnan minnka við mig vegna aldurs svo oddvitastaða er ekki draumastaða hjá mér heldur styðja og vera með í baráttunni fyrir góðum málum flokksins,“ segir Helga í svari til fréttastofu.

Dóra Björt Guðjónsdóttir, oddviti Pírata í borginni, segist ekki vera búin að gera upp við sig hver næstu skref verða. 

Ekki náðist í Heiðu Björgu Hilmisdóttur borgarstjóra við vinnslu fréttarinnar.

Fréttin hefur verið uppfærð með svörum frá Helgu Þórðardóttur.