Quang Le stefnir Lands­bankanum

Quang Le, einnig þekktur sem Davíð Viðarsson, er grunaður um mansal, peningaþvætti og skipulagða glæpastarfsemi. Hann hefur verið til rannsóknar síðan í mars á síðasta ári en Landsbankinn sagði upp viðskiptum við hann 13. mars.

Sjá nánar: Mál Quangs Le (Davíðs Viðarssonar)

Í stefnu Le, sem Mbl.is hefur undir höndum og greinir frá, segir að hann hafi ekki getað þegið laun eða greiðslur í um eitt og hálft ár. Þar segir einnig að í stefnunni segi að ein ástæða bankabannsins sé kynþáttur hans, en Le er frá Víetnam.

Er Landsbankinn sagði upp viðskiptum við Le tilkynntu þau hann einnig í innlend og alþjóðleg upplýsingakerfi fjármálastofnanna vegna grunsamlegrar færslu eða hegðunar stefnanda eða viðskipta. Það væri vegna þess að grunur léki á peningaþvætti eða fjármögnun hryðjuverka.

Málið verður þingfest á morgun og hefur Jóni Þorvarði Sigurgeirssyni, stjórnarformanni Landsbankans, verið stefnt fyrir hönd bankans. Í stefnunni er gerð krafa um að starfsmenn bankans sem komu að ákvörðuninni gefi skýrslu fyrir dómi.

Fréttin hefur verið uppfærð. Upphaflega var haft upp úr frétt Morgunblaðsins að stjórnarformaður Landsbankans gæfi skýrslu fyrir dómi en það reyndist ekki rétt.