Mark­vörður ís­lenska liðsins með fimm mörk

Íslenska liðið vann í dag sextán marka sigur á Sádi-Arabíu, 43-27, eftir að hafa verið 22-11 yfir í hálfleik.

Sigurjón Bragi Atlason, markvörður íslenska liðsins, átti flottan leik á báðum endum vallarins. Hann varði sex skot en hann skoraði einnig fimm mörk yfir allan völlinn. Það er væntanlega nýtt met hjá íslenskum markverði í landsleik þó að HSÍ geti ekki staðfest það á heimasíðu sinni.

Stefán Magni Hjartarson var þó valinn maður leiksins af mótshöldurum, þó hann hafi aðeins leikið fyrri hálfleik átti hann fantagóðan leik bæði í vörn og sókn. Stefán var markahæstur í íslenska liðinu með sjö mörk.

Strax í upphafi leiks sýndi íslenska liðið yfirburði á öllum sviðum leiksins og náði leikurinn aldrei að verða spennandi. Eftir um tuttugu mínútna leik var staðan 16-6 og þegar blásið var til hálfleiks höfðu strákarnir okkar 11 marka forystu 22-11.

Þó að okkar menn hafa slakað á klónni í síðari hálfleik þá hélt munurinn áfram að aukast. Sádar reyndu sig áfram með sjö sóknarmenn en yfirleitt endaði það með auðveldum mörkum íslenska liðsins, þegar upp var staðið höfðu strákarnir okkar sextán marka sigur, 43-27.

Mörk íslenska liðsins: Stefán Magni Hjartarson 7, Ágúst Guðmundsson 6, Sigurjón Bragi Atlason 5, Dagur Árni Heimisson 5, Elís Þór Aðalsteinsson 3, Bessi Teitsson 3, Marel Baldvinsson 3, Daniel Montoro 2, Dagur Leó Fannarsson 2, Jens Bragi Bergþórsson 2, Haukur Guðmundsson 1, Hrafn Þorbjarnarson 1, Andri Erlingsson 1, Ingvar Dagur Gunnarsson 1 og Garðar Ingi Sindrason 1.

Á morgun er frídagur hjá liðinu en næsti leikur liðsins er á móti Brasilíu á laugardaginn og hefst hann klukkan tólf að íslenskum tíma.