Von­brigði með makrílinn en síldin og loðnan veki von

Þéttleiki makríls í íslenskri landhelgi mælist sá minnsti í fimmtán ár, eða síðan leiðangur var fyrst farinn sumarið 2010. Rannsóknarskipið Árni Friðriksson lauk þátttöku í árlegum alþjóðlegum uppsjávarvistkerfisleiðangri í Norðurhöfum í lok júlí. Í leiðangrinum veiddist makríll á 13 af 46 yfirborðstogstöðvum sem allar voru austur af landinu. Aflinn var lítill, en heildarafli makríls í leiðangrinum var 97 kíló, aðeins 164 fiskar.

Þetta segir Gunnþór Ingvason, framkvæmdastjóri Síldarvinnslunnar og formaður Samtaka fyrirtækja í sjávarútvegi, vera ákveðin vonbrigði.

„Það er ekki mikill makríll í íslenskri lögsögu samkvæmt þessum leiðangri. Þetta er það lægsta sem þeir hafa, þéttleikinn sá minnsti, sem þau hafa orðið vör við frá 2010 og stór fiskur. En auðvitað höfum við verið að sjá þetta í veiðinni þar sem við höfum veitt minna í íslenskum sjó núna en til dæmis í fyrra og meira í Smugunni. Við höfum auðvitað séð ár þar sem þetta hefur sveiflast þannig að veiðin hefur verið meiri í Smugunni en í íslenskum sjó. En auðvitað er full ástæða til að hafa ákveðnar áhyggjur af þessu. Að hann sé ekki að skila sér með sama hætti inn í íslenskan sjó,“ segir Gunnþór.

Það geti að hluta til veikt stöðuna ef hlutfallslega meira magn makríls er veiddur á alþjóðlegu hafssvæði.

„En auðvitað er of mikið að draga ályktanir út af einu ári eða svona sveiflum. Það er að ganga bara vel að veiða makrílinn en við höfum veitt aðeins meira í Smugunni en undanfarin ár. Við höfum líka verið að sjá það í veiðinni síðustu ár að við höfum ekki verið að sjá kannski smærri fisk koma með sama hætti inn í lögsöguna og áður. Þannig það hefur vantað kannski nýliðunina inn í lögsöguna.“

Niðurstöður bráðabirgðamælinga Hafró hvað varðar aðrar tegundir veki hins vegar bjartsýni. „Það eru líka margir jákvæðir punktar í þessu. Við erum að sjá síld víða og það er síld að koma upp á mörgum togstöðum hjá þeim. Þeir eru að sjá mun meira magn af kolmuna við landið en þeir hafa séð undanfarið í þessum leiðöngrum. Og svo er náttúrlega rúsínan í pylsuendanum er að sjá loðnuna á mjög stóru svæði fyrir norðan land sem að ætti að vekja okkur einhverja bjartsýni,“ segir Gunnþór.