Segir á­rásum fjölga eftir því sem kvennaboltinn stækkar

Þessi ummæli Bronze koma í kjölfar þess að liðsfélagi hennar í enska landsliðinu, Jess Carter, greindi frá því að hún hafi orðið fyrir kynþáttaníð á samfélagsmiðlum. Carter sagði einnig að hún ætlaði að taka sér hlé frá miðlunum vegna þess.

Bronze, sem hefur verið í lykilhlutverki með enska landsliðinu á Evrópumótinu í Sviss í sumar, segir að þetta sé því miður slæmur fylgifiskur þess að kvennaboltinn sé að stækka.

„Eftir því sem leikurinn stækkar, því meiri hávaði verður í kringum hann og því fleiri stuðningsmenn verða til, en það heyrast líka fleiri gagnrýnisraddir,“ sagði Bronze.

„Við erum auðvitað opnar fyrir gagnrýni, og þess vegna elskum við þessa íþrótt. En við erum ekki opnar fyrir árásum. Árásir á netinu virðast vera að verða verri og verri, sérstaklega í kvennaboltanum.“

„Við sjáum þetta meira á vellinum í karlaboltanum, og einnig á netinu, en í kvennaboltanum virðist þetta vera helst á netinu. Þetta er eitthvað sem við vitum af og það er til leið til að breyta þessu. Það er til lausn. Ég er ekki með svörin við því hver hún er, en ég er viss um að hún sé til.“