Segir ferða­þjónustunni mis­munað og efnir til mót­mæla

„Hvernig getur það staðist að Bláa Lónið og Northern Light Inn séu opin en gestum er ekki leyft að koma til Grindavíkur?“ skrifar Dagmar Valsdóttir eigandi Grindavík Guesthouse í skoðunargrein sem birt var á Vísi í morgun. 

„Mismunun án skýringa“

Ríkislögreglustjóri, í samráði við lögreglustjórann á Suðurnesjum, ákvað í gær að opna fyrir aðgang íbúa Grindavíkur að bænum. Fram kom í tilkynningu að íbúar og starfsfólk fyrirtækja dvelji í bænum á eigin ábyrgð en öðrum er ekki heimilt að fara inn í Grindavík. Líkt og fyrr segir er almenningi þó heimilaður aðgangur að Bláa lóninu og Northern Light inn hótelinu við Svartsengi.

Dagmar furðar sig á þeim ráðstöfunum í ljósi þess að Svartsengi er nær eldgosinu sem hófst í gærnótt heldur en Grindavík.

Að því tilefni hefur hún efnt til mótmæla við lokunarpóstinn hjá Grindavík, sem einmitt er staðsettur við Bláa lónið. Hún er meðal starfsmanna ferðaþjónustunnar sem hafa orðið fyrir tekjutapi vegna lokana tengdum eldsumbrotum á Reykjanesskaga. 

„Við finnum fyrir mismunun án skýringa. Við sendum tölvupósta, spyrjum spurninga, leitum upplýsinga en enginn svarar,“ skrifar Dagmar í greininni. 

Í samtali við fréttastofu segist hún vona að sem flestir sjái sér fært að mæta á mótmælin, sem hefjast klukkan tólf, og krefjast breytinga. Hún segist sýna því skilning þegar bærinn er rýmdur í upphafi eldgoss en skilur ekki hvers vegna lokanir standa yfir jafn lengi og þær gera.

„Þetta er ekki í fyrsta sinn sem okkur hefur verið mismunað. Við erum auðvitað mjög ánægð að Bláa lónið opni en við skiljum ekki af hverju við megum ekki opna líka,“ segir Dagmar og bendir á að án ferðamanna í Grindavík sé ekki hægt að reka ferðaþjónustufyrirtæki. 

„Við þurfum stanslaust að berjast fyrir því að geta haldið áfram. Ríkisstjórnin vill ekki hjálpa okkur, þau eru búin að kötta á allt. Hvernig eigum við að geta haldið áfram þegar það er alltaf verið að koma í veg fyrir að við getum það? Ég held að fólk geri sér ekki grein fyrir því hvað þetta er alvarlegt. Og það tekur enginn ábyrgð.“

Lokanir „bjánalegar“

Fleiri fyrirtækjaeigendur í ferðaþjónustunni hafa gagnrýnt aðgerðir stjórnvalda á tímum eldgosa. Gylfi Arnar Ísleifsson eigandi pítsustaðarins Papas í Grindavík var ómyrkur í máli þegar fréttamaður náði tali af honum í gær. 

Hann sagðist hafa orðið fyrir miklu tjóni en hann á bæði veitingastað og gistihús í bænum. Í dag þurfi hann að endurgreiða fjölda fólks sem ætlaði að gista í bænum vegna lokunarinnar. Þá sagðist hann ekki skilja hvers vegna ákveðið hafi verið að loka bænum, gosið sé í góðri fjarlægð frá Grindavík og gasmengun hafi einungis mælst í Reykjanesbæ.

„Og hvað eru þeir að gera núna? Þeir vita hvar gosið er, loftgæðin eru vond hinum megin og hvað gera þeir? Loka Grindavík?“ sagði Gylfi.

„Girðið ykkur í brók, Veðurstofa og Almannavarnir.“