Fótbolti

Þjálfara Finna létt skömmu fyrir fyrsta leik á EM gegn Ís­landi

Aron Guðmundsson skrifar
Natalia Kuikka og Marko Saloranta eru fyrirliði og þjálfari finnska landsliðsins. Þau sátu fyrir svörum á blaðamannafundi í Thun, degi fyrir fyrsta leik EM þar sem Finnland og Ísland mætast.
Natalia Kuikka og Marko Saloranta eru fyrirliði og þjálfari finnska landsliðsins. Þau sátu fyrir svörum á blaðamannafundi í Thun, degi fyrir fyrsta leik EM þar sem Finnland og Ísland mætast. vísir/Anton

Evrópumótið í fótbolta virðist koma á góðum tíma fyrir landslið Finnlands sem mætir Íslandi í fyrsta leik liðanna í A-riðli mótsins. Eftir yfir fimmtán mánaða tímabil sem einkennst hefur af meiðslabrasi virðist þjálfarinn geta veðjað á sína helstu hesta.

„Við horfum á síðustu æfinguna og ræðum svo saman þjálfarateymið. Þetta lítur vel út fyrir leikinn gegn Íslandi miðað við hver staðan hefur verið upp á síðkastið,“ sagði Marko Saloranta, þjálfari finnska liðsins, aðspurður um stöðuna á leikmönnum í aðdraganda fyrsta leiks á EM.

Útlit sé fyrir að Emma Koivisto, leikmaður AC Milan og öflugur bakvörður finnska liðsins, sem gegnir stóru hlutverki bæði í sókn og vörn, nái að taka þátt eftir meiðslabras.

„Hún hefur verið að æfa með liðinu, allt lítur vel út. Hún ætti ekki að vera spurningarmerki en það er ein æfing eftir og eftir hana metum við stöðuna. Mér er létt því við höfum tuttugu leikmenn heila heilsu til viðbótar við markverðina okkar þrjá.“

Leikur Íslands og Finnlands á EM í fótbolta hefst klukkan fjögur í dag og verður lýst í beinni textalýsingu hér á Vísi. Með því að smella á hlekkinn hér fyrir neðan má finna allar fréttir tengdar EM í fótbolta.

EM 2025 í Sviss Landslið kvenna í fótbolta

Mest lesið


Fleiri fréttir

Sjá meira


×

Mest lesið