Norris vann í Austur­ríki og minnkaði for­skot liðsfélagans

Lando Norris stóðst pressuna frá liðsfélaga sínum Oscar Piastri og minnkaði forskot Piastri í heimsmeistarakeppni ökumanna í fimmtán stig. 

Ferrari maðurinn Charles Leclerc var síðan þriðji maður á verðlaunapallinum. Lewis Hamilton varð fjórði, George Russell fimmti og Liam Lawson náði sjötta sætinu.

Liðsfélagarnir voru í hörkukeppni allan kappaksturinn og gáfu ekkert eftir. Norris var á ráspól og hélt út. 

Þetta var flott endurkoma hjá Norris eftir vonbrigðin í Kanada í síðustu keppni. Hann var að vinna sinn þriðja kappakstur á tímabilinu eftir að hafa unnið einnig í Mónakó og í Ástralíu. Piastri hefur á móti unnið fimm keppnir.

Þetta var spennandi keppni ekki síst þar sem hitinn var mikill og menn í alls konar vandræðum með dekkin sín.

Piastri er nú efstur ökumanna með 216 stig, Norris er með 201 stig og Max Verstappen er nú þriðji með 155 stig

Yfirburðir McLaren-Mercedes í liðakeppninni eru miklir og jókst enn með þessum tvöfalda sigri í dag. McLaren hefur nú 417 stig eða 207 stigum meira en Ferrari.

Heimsmeistarinn Max Verstappen datt snemma úr keppni eftir árekstur við Andrea Kimi Antonelli í þriðju beygju í fyrsta hring.