Dönsk stjórn­völd vilja tryggja fólki höfundar­rétt að eigin per­sónu

Breytingin er svar danskra stjórnvalda við tækniþróun síðustu ára, sem hefur gert það að verkum að auðvelt er að falsa myndir og myndskeið þannig að þau sýna raunverulegar persónur í óraunverulegum aðstæðum.

Tillagan er sögð njóta yfirgnæfandi þverpólitísks stuðnings í þinginu.

Menningarmálaráðherrann Jakob Engel-Schmidt segist vonast til þess að í frumvarpinu felist skýr skilaboð um að allir eigi rétt á eigin persónu; útliti og rödd. 

Breytingunum er ætlað að tryggja að einstaklingar geti krafist þess að vefsíður og miðlar fjarlægi falsað efni þar sem viðkomandi kemur við sögu.

Þá er gert ráð fyrir því að þeim verði gert kleift að sækja bætur.

Engel-Schmidt segist vonast til þess að frumvarpið verði öðrum Evrópulöndum innblástur.