Lyon mun á­frýja og Crystal Palace í ó­vissu

Eigendur Lyon lýsa málinu sem algjöru hneyksli í yfirlýsingu sem félagið sendi frá sér í gærkvöldi. Óskiljanlegt sé að fella lið, sem hefur náð nógu góðum árangri til að komast í Evrópukeppni undanfarin tvö tímabil, niður um deild. Dómnum verði áfrýjað og Lyon muni reiða fram gögn sem sanna að félagið sé rekstrarhæft úrvalsdeildarlið.

„Þökk sé innspýtingu fjármagns frá eigendum félagsins og sölunni á Crystal Palace hefur lausafjárstaðan batnað til muna og við höfum nú meira en nóg fjármagn fyrir næsta tímabil“ segir í yfirlýsingu Eagle Football Group, eigenda Lyon.

Salan á Crystal Palace hefur hins vegar ekki gengið formlega í gegn, félagið er því enn undir sama eignarhaldi og hefur ekki fengið staðfestingu frá UEFA um þátttöku í Evrópudeildinni á næsta ári, samkvæmt breska ríkisútvarpinu.