Dæmdur fyrir líkams­á­rás á meðan hann er grunaður um morð

Aðalkrafa Lúkasar við áfrýjun var að dóminum yrði ómerktur og vísað aftur heim í hérað. Krafan var reist á því að dómari í héraði hafi orðið vanhæfur til að fara með málið á grundvelli þess að hann hefði ítrekað reynt að fá ákærða til að breyta framburði sínum, einkum með því að þráspyrja hvort ákærði þekkti þann mann sem sást með honum á myndupptöku sem spiluð var við aðalmeðferð málsins. 

Landsréttur taldi dómara heimilt að leggja þessar spurningar fyrir Lúkas þar sem gert er ráð fyrir því að dómari gæti þess að skýrslutaka fari eðlilega fram. Hann geti krafist frekari skýringa á svari vitnis telji hann á því þörf. Landsréttur féllst ekki á að framganga dómarans hefði gefið ákærða með réttu tilefni til að draga óhlutdrægni hans í efa.

Hrottalegt manndráp, frelsissvipting, rán og fjárkúgun

Lúkas hefur, líkt og fréttastofa hefur ítarlega fjallað um, verið ákærður ásamt þeim Stefáni Blackburn og Matthíasi Birni Erlingssyni, fyrir hrottalegt manndráp í Gufunesmálinu. Þeir námu mann á sjötugsaldri á brott frá heimili hans og beittu hann hrottafengnu ofbeldi sem leiddi til bana hans. Þeir voru ásamt manndrápinu ákærðir fyrir frelsissviptingu, rán og fjárkúgun.

Í ákærunni segir að Stefán og Lúkas Geir hafi, með aðstoð konunnar, narrað Hjörleif Hauk Guðmundsson, 65 ára, af heimili hans í Þorlákshöfn og ekið honum að Hellisheiðarvirkjun. Á leiðinni hafi þeir beitt hann margvíslegu ofbeldi. Þeir hafi til að mynda brotið í honum fimm tennur, sett poka yfir höfuð hans og reynt að fá út úr honum aðgangsorð að bankareikningum hans.

Seinna í iðnaðarhúsnæði á Kjalarnesi segir þeir hafi beitt þeir Hjörleif frekara ofbeldi með hnefahöggum, spörkum og ótilgreindu áhaldi. Því næst hafi hópurinn farið með Hjörleif að leiksvæði í Gufunesi þar sem ofbeldi hélt áfram. Þar fannst hann örendur snemma morguns og lést af sárum sínum á sjúkrahúsi stuttu seinna.

Lúkas Geir, sem er 21 árs, var á meðal brotaþola í Bankastræti Club málinu svokallaða þar sem hópur grímuklæddra karlmanna réðst inn á samnefndan skemmtistað í miðborg Reykjavíkur með hnífa á lofti.

Stappaði á höfuð mannsins eftir varnarsparkið

Lúkas var dæmdur ásamt öðrum manni í Héraðsdómi Reykjavíkur þann 26. apríl 2024 fyrir sérstaklega hættulega líkamsárás sem framin var 6. nóvember 2021 í Hafnarstræti í miðborg Reykjavíkur. Hann veittist í félagi við annan mann að hinum þriðja, sparkaði í efri búk hans og í kjölfar þess að hann féll í jörðina stappaði hann á höfði mannsins er hann lá varnarlaus á jörðinni. Fórnarlambið hlaut af hrufl á enni og handarbaki, höfuðkúpubrot, andlitsbeinabrot ásamt mari í vinstri gagnaugaheilableðli með mildri blæðingu og opið sár í hársverði.

Við leit á Lúkasi á lögreglustöðinni á Hverfisgötu kom einnig í ljós að hann var með lítil magn af maríhúana í fórum sínum.

Við yfirheyrslu hélt Lúkas því fyrst fram að engar skærur hefðu átt sér stað og að áverkar brotaþola hefðu orsakast af því að hann hefði verið ölvaður og fallið í jörðina. Eftir að lögreglumenn sýndu honum upptöku af árásinni bar hann fyrir sig neyðarvörn. Aðdragandanum lýsti hann þannig fyrir dómi að hann hefði verið í bíil í miðbænum með félögum sínum. Bílaröðin hefði ekkert hreyfst og þeir hefðu farið til að athuga hvað ylli. Þar hefðu menn staðið við einn bílinn og hefði verið þar einhver atgangur.

Lúkas sagði brotaþola hafa ýtt við sér, sagt sér að fara og hótað sér lífláti og að vinur hanns hefði þurft að taka hann burt. Allt í einu hefði hann séð þegar brotaþoli kom á harðahlaupum í áttina að honum. Lúkas sagðist þá hafa varið sig með því að sparka í brotaþola og hann dottið í jörðina. Hann hefði orðið mjög hræddur. Hann sagðist ekki hafa orðið var við það sem gerðist í kringum hann, hann hefði einfaldlega séð einhverjum bregða fyrir að baki sér og brugðist við. Hann sagðist ekki hafa veist að brotaþola eftir sparkið. Nánar spurður eftir að hafa séð upptöku úr öryggismyndavél kvaðst hann aðeins hafa gert tilraun til að sparka en að félagi hans hefði sparkað í brotaþola.

Framburður Lúkasar fráleitur

Brotaþoli sagði fyrir dómi að hann hefði verið að skemmta sér í miðbænum. Hann hefði drukkið áfengi en ekki fundist sem hann væri mjög ölvaður. Hann kvaðst ekki geta skýrt hvað fyrir sér hefði vakað þegar hann hljóp íáttina að árásaraðilunum eins og sést á myndskeiði. Hann myndi ekkert eftir að hafa hitt árásaraðilana og hefði frá öðrum upplýsingar um það sem gerðist.

Með myndskeiðum og framburðum annarra vitna í málinu þótti héraðsdómi það sannað að Lúkas Geir átti ekki upptökin að ofbeldinu. Að mati dómsins uppfyllti fyrsta spark hans skilyrði neyðarvarnar.

„Á hinn bóginn héldu ákærðu samhentir áfram og veittust ákveðið og hiklaust að brotaþola með spörkum sem beindust að höfði og efri hluta líkama. Framburður ákærða Lúkasar Geirs um að hann hafi þarna hvorki séð né gert sér grein fyrir háttsemi meðákærða er fráleitur og að engu hafandi,“ segir í dóminum.

Lúkas Geir var gert að sæta fangelsi í sex mánuði skilorðsbundið til tveggja ára. Fíkniefnin í fórum hans umrætt kvöld voru gerð upptæk og Lúkasi var gert að greiða brotaþola tæplega 2,2 milljónir króna í miskabætur. Honum var einnig gert að greiða málsvarnarlaun verjanda síns sem nam rúmri 1,6 milljón króna og aukaleg nokkur hundruð þúsund krónur í annan sakarkostnað.

• DómurDÓMURLANDSRÉTTAR
  Sækja skjal