Fjögur rauð spjöld á loft í Lengjudeildinni

Sigur Þróttar var öruggur, liðið skoraði tvö góð mörk sitt hvorum megin við hálfleikinn en missti síðan mann af velli. Baldur Hannes Stefánsson fékk klaufalegt seinna gult spjald, fyrir að sparka boltanum upp í loft eftir að dómarinn flautaði. Það kom hins vegar ekki að sök, Selfyssingar náðu ekki að minnka muninn.

Leikur Völsungs og Keflavíkur leystist upp í vitleystu með þremur rauðum spjöldum. Jakob Héðinn kom Völsungi yfir rétt fyrir hálfleik.

Í seinni hálfleik missti Keflavík svo fyrst mann af velli þegar Marin Brigic fékk beint rautt spjald fyrir að tækla Jakob sem var sloppinn í gegn.

Sjö mínútum síðar jafnaði Keflavík hins vegar með marki Stefans Ljubicic úr vítaspyrnu, eftir að Inigo Albizuri Arruti braut af sér í vítateignum og fékk annað gult spjald.

Staðan jöfn og tíu menn í báðum liðum á þeim tímapunkti. Hvorugu liði tókst að setja sigurmarkið en eitt rautt spjald enn átti eftir að fara á loft í uppbótartíma þegar Gunnar Kjartan Torfason kastaði boltanum burt eftir dómaraflaut og fékk annað gult spjald.

Tíu Keflvíkingum tókst hins vegar ekki að setja sigurmarkið gegn níu Völsungum og leikurinn endaði með 1-1 jafntefli.