Iðnaðar­maður ársins hlustar á IceGu­ys til að koma sér í stuð

Eyjólfur verður 24 ára í næsta mánuði og er með sveinspróf í múraraiðn. Hann á kærustu og starfar í dag hjá Múrþjónustu Helga Þorsteins sem er staðsett í Hveragerði en mest vinnur hann þó á höfuðborgarsvæðinu. Í frítíma sínum spilar hann golf og hlustar á IceGuys til að koma sér í stuð.

„Starf múrara er mjög fjölbreytt og enginn dagur eins,“ segir Eyjólfur. „Einn daginn er ég að flota, næsta kannski að flísaleggja og þann þriðja að vinna í sprunguviðgerðum. Svo er maður líka í alls konar skítavinnu eins og að brjóta og slípa.“ Þótt Eyjólfur hafi útskrifast í fyrra hefur hann þó starfað við fagið í nokkur ár.

Eyjólfur kynntist starfinu upphaflega í sumarvinnu og fannst það svo skemmtilegt að hann sótti um í Tækniskólanum „Ég stefni á að taka meistarann seinna en er ekkert að flýta mér.“

En hvað er það helst við starf múrara sem fólk veit ekki almennt? „Starfið er léttara en margur heldur og þá meina ég þetta er ekki eins erfið líkamleg vinna og margir halda.“

Á hverju vori taka útvarpsstöðin X977 og Sindri höndum saman og verðlauna iðnaðarmann ársins. Iðnaðarmenn geta skráð sig til leiks og almenningur getur einnig tilnefnt uppáhalds iðnaðarmanninn sinn. Dómnefnd velur að lokum átta iðnaðarmenn úr sem þjóðin kýs á milli hér á Vísi.

Iðnaðarmaður ársins fær í verðlaun glæsilegan pakka frá Sindra sem inniheldur alklæðnað frá Blåkläder og sex véla sett frá DeWalt. „Ætli ég sé ekki mest spenntur fyrir brotvélinni en það er hægt að nota hana í svo mörg ólík verk.“

Hann ætlar að njóta sumarsins á Íslandi og stefnir m.a. á Þjóðhátíð í Eyjum. „Ég hef aldrei skilið fólk sem fer til útlanda yfir sumartímann. Mér finnst best að njóta íslenska sumarsins og kíkja frekar til útlanda yfir háveturinn. Það fer líka vel saman við starfið því það er alltaf mikið að gera hjá okkur á sumrin. Kannski kíki ég í sólina þegar kuldinn og myrkrið verður sem mest næsta vetur.“

Við óskum Eyjólfi til hamingju með titilinn.