ÍBV sótti sigur og sæti í undan­úr­slitum

Olga Sevcova tók forystuna fyrir ÍBV eftir aðeins fimm mínútna leik með góðri afgreiðslu eftir að hafa sloppið auðveldlega ein í gegn. Að öðru leiti gerðist lítið í fyrri hálfleik.

Um miðjan seinni hálfleik dró aftur til tíðinda þegar Birgitta Rún Finnbogadóttir jafnaði leikinn fyrir Tindastól eftir stoðsendingu Snæfríðar Evu Eiriksdóttur, stungusending sem rataði á hárréttan stað, Birgitta sólaði markmanninn og kom boltanum yfir línuna.

Stólarnir virtust síðan líklegri til að setja sigurmarkið en aðeins fimm mínútum eftir að hafa jafnað fékk varnarmaðurinn Nicola Hauk boltann í höndina, vítaspyrna dæmd og ÍBV skoraði. Allison Grace Lowry steig á punktinn.

ÍBV hélt áfram að herja á vonsvikna Stóla og setti þriðja markið fimm mínútum síðar. Allison Patricia Clark negldi boltanum í netið eftir fyrirgjöf Olgu Sevcova.

1-3 lokaniðurstaðan fyrir norðan og ÍBV komið í undanúrslit Mjólkurbikarsins, sem fara fram 30. og 31. júlí. Næstu tvo daga kemur í ljós hvaða liðum ÍBV gæti mætt.

Valur tekur á móti Þrótti á miðvikudag. Þór/KA tekur svo á móti FH áður en Breiðablik tekur á móti HK á fimmtudag.