Dabbi kóngur fram­lengir og Þór sækir tvo frá Sel­fossi

Davíð Arnar Ágústsson, eða Dabbi kóngur eins og hann er yfirleitt kallaður í Þorlákshöfn, framlengdi sinn samning. Þá sótti Þór einnig tvo leikmenn, Ísak Júlíus Perdue og Skarphéðin Árna Þorbergsson, úr liði Selfoss sem endaði í níunda sæti næstefstu deildar á síðasta tímabili. 

„Við bjóðum kappana innilega velkomna í Hamingjuna og hlökkum til að sjá þá á parketinu í vetur“ segir í tilkynningu Þórs sem má sjá hér fyrir neðan.

Davíð Arnar er 190 sentimetra bakvörður, uppalinn í Þorlákshöfn og var hluti af Íslandsmeistaraliði Þórs árið 2021.

Ísak Júlíus er 180 sentimetra bakvörður, einnig uppalinn í Þorlákshöfn og hluti af Íslandsmeistaraliðinu en í mjög litlu hlutverki, enda þá ekki nema átján ára gamall.

Skarphéðinn Árni er tvítugur Selfyssingur sem hefur alla tíð leikið með liðinu í heimabænum.