Erlent

Wild­ers slítur ríkis­stjórnar­sam­starfinu

Rafn Ágúst Ragnarsson skrifar
Geert Wilders, leiðtogi Frelsisflokksins, er mjög umdeildur í Hollandi.
Geert Wilders, leiðtogi Frelsisflokksins, er mjög umdeildur í Hollandi. AP/Peter Dejong

Frelsisflokkurinn hefur slitið hollenska ríkisstjórnarsamstarfinu. Leiðtogi flokksins segir stefnu sína í hælisleitendamálum hafa gert útslagið.

Geert Wilders, leiðtogi Frelsisflokksins (PVV), greinir frá þessu á samfélagsmiðlum. Hann er beinskeyttur í yfirlýsingu sinni.

„Ekkert samkomulag um hælisleitendamálin. Engar málamiðlanir í stefnu okkar. Frelsisflokkurinn yfirgefur stjórnarsamstarfið,“ segir hann í færslu sem hann birti snemma í morgun.

Ríkisstjórnin, sem Dick Schoof forsætisráðherra fer fyrir, hefur verið við stjórn í rúmt ár en rúmt hálft ár tók að mynda hana. Frelsisflokkur Wilders vann flest sæti á hollenska þinginu í kosningunum en Wilders fékk ekki embætti forsætisráðherra í sitt skaut. Hann er mjög umdeildur stjórnmálamaður í Hollandi en hann hefur talað fyrir mjög strangri innflytjenda- og hælisleitendastefnu.

Flokkarnir sem mynduðu stjórnina voru, ásamt Frelsisflokknum, Þjóðarflokkur Mark Rutte, hinn íhaldssami NSC-flokkur og Bændahreyfingin (BBB).

Leiðtogar stjórnarflokkanna hafa brugðist ókvæða við yfirlýsingu Wilders. Van der Plas, leiðtogi Bændahreyfingarinnar, segir hann gefa Holland vinstrinu á silfurfati og Van Vroonhoven, leiðtogi NSC-flokksins, segir ákvörðun hans „með öllu óskiljanlega.“




Fleiri fréttir

Sjá meira


×