„Ekkert nema gott að segja fyrir gróðurinn og sálar­líf lands­manna“

Veðrið hefur leikið við landann víðast hvar um landið í dag. Hitinn varð hæstur í Fnjóskadal í Suður-Þingeyjarsýslu og náði um 25 stigum þar en í gær var heitast á Egilsstöðum þar sem hitamet féll. Um helgina verður hvað heitast á norðausturlandi.

Lillý Valgerður, fréttamaður Stöðvar 2, kíkti í Grasagarðinn í Laugardal og ræddi þar við Vilmund Hansen, garðyrkjufræðing.

Hvernig er gróðurinn að koma út úr þessu öllu?

„Þetta er náttúrulega bara allt æðislegt, gróðurinn er þremur vikum á undan og þetta er ekkert nema gott, það er það eina sem ég get sagt þér. Þetta hefur ekkert nema gott að segja fyrir gróðurinn og sálarlíf landsmanna,“ sagði Vilmundur.

Blómaræktendur anni ekki eftirspurn

Á þremur vikum hafi allt farið í blóma að sögn Vilmundar. Góða veðrið hafi komið aftan að flestum.

Hvað þýðir þetta fyrir grasið? Þurfa bændur að slá fyrr?

„Jájá, það er engin spurning að bændur koma til með að byrja heyskap miklu fyrr. Og ef þetta helst svona verður tvíslegið og jafnvel þríslegið í sumar,“ sagði hann.

Hvað ef það kólnar? Það er miður maí og flestir stressaðir að kuldinn komi.

„Ég athugaði langtímaspána. Mér sýnist vera gott veður fram að mánaðamótum allavega. Svo gæti nú kannski kólnað eitthvað eftir það en þá verður komið sumar þannig það breytir engu. Þetta verður allt í lagi,“ sagði Vilmundur.

Er þetta óvenjulegt, hefurðu séð þetta oft svona í maí?

„Nei, þetta er óvanalegt, þremur vikum á undan og hefur komið aftan að manni,“ sagði Vilmundur.

„Ég veit að þeir sem eru að framleiða sumarblóm eru ekkert með allt tilbúið. Fólk er fljótt upp á bragðið þegar það kemur sól, rýkur af stað og vill blómin sín og ekkert kjaftæði. En þau eru bara ekkert tilbúin vegna þess að á síðasta ári til dæmis var rigning og þar áður var skítakuldi. Þannig þetta er óvenjusnemmt,“ sagði hann að lokum.